New Delhi, Nailur:
Ka Myntri Rangbah jong ka Delhi ka Atishi bad ki Myntri kiba don ha ka kynhun jong ka ki la mih sha ki surok bad ki lynti ki syngkien na ka bynta ban leit jurip bniah ïa ki jinglong-jingman jong ki surok kiba don ha ka nongbah kum shi bynta ban leh ïa kaei ba ka sorkar Aam Aadmi Party (AAP) ka thmu ban pyndap ïa ki thliew ki syar ha ki surok ka nongbah ha shwa ka jinglehkmen Diwali.
“Baroh kawei ka kynhun ki Myntri jong ka sorkar Delhi ki la don bynta ha ka jingpyntreikam kaba la long naduh ka por 6 baje mynstep na ka bynta ban leit jurip bniah ïa ki surok bad thmu ban pyndap bad pynbha ruh ïa baroh ki surok PWD ha Delhi. Nga la buh ïa ki surok ha NSIC Okhla, Modi Mill flyover, Chirag Delhi, Tughalakabad Extension, Mathura Road, Ashram Chowk and Underpass,” la ong ka Atishi ha ka jingpyllait khubor ha ka rynsan X.
Ka la ong ba ki surok ki la sniew bha ha ka nongbah bad ki briew ki la ïakynduh ïa shibun ki jingeh namar ki jingthliew jong ki.
“Nga la bthah ïa ki heh ba dei khmih ba kin pynbha noh ïa ki surok bad ban long kiba la khreh halor kane,” ka la ong.
“Hapoh ka jingai jingkyrshan bad ka jingdon ryngkat jong u Arvind Kejriwal, ki jingtrei shitom jong ngi kin sa pyntikna ba ki nong Delhi kin sa ïoh ïa ki surok kiba bha kiba lait na ki jingthliew ha shwa ka Diwali,” la ong ka Myntri Rangbah.
