Agartala, Nailur:
Ka sorkar Tripura ka la rai ban sam ei ïa ka shini, u suji bad u Atta sha ki 9.83 lak ngut kiba bat Card Rashon ha kylleng ka jylla ha ka sngi rakhe Durga Puja, la ong ka Myntri kaba dei khmih ïa ka tnat, Food and Civil Supplies ka Sushanta Chowdhury ha ka sngi Thohdieng.
“Ka jylla kan sam shi kilo ka shini, ar kilo u ata bad 500 gram u suji sha ki 9.83 lak ngut kiba bat Card Rashon na ka bynta ka Durga puja. Ki nongthied kin ïoh ïa ka jingmyntoi ha ka taïew ba nyngkong jong u bnai Risaw,” la ong ka Chowdhury.
Haba kren bad ki lad pathai khubor, ka Myntri ka la ong ba ka sorkar jylla ka la antad ba kan pynlut haduh 6.84 klur tyngka na ka bynta kane ka jingthmu. Ka la pyntip ruh ba ka kam ban bujli ïa ki Card Rashon kiba rim da ki kot rashon PVC kan sdang naduh ka 30 tarik u Nailur, kata mynta ka sngi.
Ka la ïathuh ruh ba ha ka jingïalang jong ka kynhun Myntri kaba la long ha ka sngi Palei, ka sorkar jylla ka la rai ban pyndap ïa 1,267 tylli ki kam kiba lait bad ban thaw thymmai ïa 193 tylli ha ki tnad bapher bapher.
Shuh shuh u la pyntip ba la shim ïa ki rai ban thaw bad pyndap ïa 194 tylli ki kam nongap pahara ha ki khlaw lyngba ka jingpynrung kam beit da ka tnad khlaw bad 254 tylli ki kam ba lait ha ki kyrdan bapher bapher jong ka Group-C ha ka tnad Revenue.
“Na ki 254 tylli ki kam baroh, 14 tylli ki dei jong ki Revenue Inspector, 10 tylli na ka bynta ki Junior Surveyor, 164 tylli na ka bynta ki Tehsildar, 29 tylli na ka bynta ki Amins, bad 37 tylli na ka bynta ki Muhuras”, u la ong.
Nalor kine, ka jylla ka la rai ruh ban pyndap ïa lai tylli ki kam kiba hap hapoh ka tnad ilekshon, ba kynthup ïa uwei u Programmer bad arngut ki Assistant Programmer, lyngba ka Tripura Public Service Commission (TPSC).
Nalor kata, yn thung 12 ngut ki nongtrei kiba bun kam hapoh ka tnad pla tyngka bad 228 ngut ki Sub Inspector hapoh ka tnad kam poh ïing lyngba ka TPSC. Yn thung ruh ïa kumba 19 ngut ki nongñiah kali bad 88 ngut ki nongtrei ha bun tylli ki kam kiba hap hapoh ka GA bad SA, la pyntip ka Myntri.
Ha ka bynta jong ka tnat pule-puthi, ka Choudhury ka la pyntip ba ka kynhun Cabinet ka la rai ban thung ïa kumba 125 ngut ki Librarian ha ki 125 tylli ki skul Vidyajyoti.
Ka sorkar ka la mynjur ruh ban thaw 118 tylli ki kam na ka bynta ki nonghikai Computer Science Post-Graduate bad la thaw biang 75 tylli ki kam jong ki Junior Physical Instructor hapoh ka tnad Sports and Youth Affairs.
