Vijayawada, Risaw:
Kum shi bynta ban pynpaw ba ka sorkar NDA ba ïalam da ka seng TDP ka thmu ban pyllait ïa ka jylla na ka jingma jong u Ganja, u drok bad kiwei kiwei ki jingdih pynbuaid, ka Myntri jong ka tnat ki kam pohïing ka Vangalapudi Anitha ka la pynbna ba yn buh ïa ka kynhun ka ban tehlakam ïa ka jingpyndonkam ne kyrni ha ki jingdih pynbuaid haman ki distrik.
Ki Myntri kiba kynthup ïa ka Anitha, N Lokesh, Satya Kumar Yadav, Kollu Ravindra bad G Sandhya Rani ki la pynlong ïa ka jingïalangban bishar bniah ha Secretariat na ka bynta ban ïakren halor ka riti synshar jong ka kynhun treikam jong ka Narcotics Task Force ha ka jylla ha ka Sngi Palei.
Ha ka jingïakren bad ki nongthoh khubor, ka Myntri ka tnat ki kam pohïing ka la pynpaw ïa ka jingsngewkhia halor ka jingkiew ki kam beaiñ ha ka Jylla haba ïanujor bad ki snem ba la dep bad pyntip ba ka Jylla ka ïeng ha ka kyrdan kaba san ha kaba ïadei bad ka jingpynïap ïalade namar ka jingdih kyiad bad jingkyrni dih Ganja.
“Ïa ki kam rep Ganja bad shalan tuh yn tehlakam lyngba ka kynhun treikam da ka jingïarap jong ki kor ki bor kiba thymmai kum ki dDone, ki GPS, ki Block Chain bad ki AI lyngba ka CCTV Camera,” ka la batai bniah.
Ka la ong ruh ba ki nongai khubor kiba pynpoi ïa ki jingtip shaphang ka jingdon jong ki jingkit jingbah da ka lynti kaba beaiñ, ka jingkhaïi mar tuh bad ka jingrep ïa u Ganja kin sa ïoh khusnam.
“Yn pynlong ïa ki prokram ba kyrpang ban pynsngewthuh ïa ki jingsniew jong u Ganja bad kiwei kiwei ki jingdih pynbuaid. Ka jingïashim bynta jong ki paidbah ka long kaba kongsan bha ban ïada na ka jingdih kyiad ki samla. La shim ruh ïa ki lad ki lynti kiba kyrpang ban kem ïa kiba shah kynnoh kiba ju pynbiang ha ka ban phah Ganja sha ki samla kiba dei ki riewlum,” ka la ong.
