Raipur, Naitung:
Kum ka jingjop jong ka jingkyrmen halor ki kam pyntriem, ka baje jong ka skul ka la riew biang sha ki kyndong kynshrot kiba jylliew tam, jong ka distrik Bijapur jong ka jylla Chhattisgarh.
Ka jingthmu kaba pawnam ka la jop ban pynim biang ïa palat 1,000 ngut ki khynnah na ka jingshah iehnoh beiñ ha ka pule puthi, da kaba pynskhem biang ïa ki ha ka lynti ba kongsan jong ka jingpule ba la buh ryntih hadien 21 snem jong ka jingdum.
Da kaba pynkhih da ka jingthmu ba skhem jong ka sorkar jylla bad ka jingïakhih ba raikut ba la ïalam da u Vishwadeep, haduh 37 tylli ki skul kiba la jah slem bha ki la plie biang ha kane ka snem pule-puthi bathymmai.
Ha kylleng ki jaka ba jngai jong ka distrik kum ka Bijapur, Bhairamgarh, Usur, bad Bhopalpatnam, ki jaka ba heh bha ha kaba ki nongïalam ba rangbah jong ka Naxal ki ju shong mynshuwa, ka jingkylla kaba khraw ka dang jia. Hadien ka jingpynbna pahara bad ka jingpynbna ïa kine ki shnong kum ki shnong kiba lait na ki Maoist, ka bor synshar distrik bad ka tnad pule skul ki la pynlong ïa ka jingïalap kaba ïatreilang hapoh ka hukum jong ka hok ban ïoh jinghikai ban pynthikna ba ym don khynnah ba sahdien.
“Ka jinghikai ïa u khynnah ha kine ki jaka ba jngai kam dei tang ka jinghikai ïa ki dak; ka dei ka jingpynphai biang ïa ka burom briew bad ka jingpynlong ïa ka jingsuk ha kaba ka jingtieng ka la synshar shisien,” la ong u Vishwadeep, u Collector jong ka Bijapur.
Ka tynrai jong kane ka jingjia ba sngewsih ha ka pule puthi ka sdang naduh u snem 2005 ha kaba la sdang ïa ka jingïakhih Salwa Judum kaba la pynmih jingïakynad pyrshah ïa u Maoist.
Nangta ki lehnoh ki la thmu da kaba ryntih ïa ki jingtei paidbah, da kaba pynbthei bad pynpra ïa palat 300 tylli ki ïing skul ha kylleng ki shnong riewlum ba la shah pynkynriah jaka. Ka jingpynjot ka thmu ban pynduh noh ïa ka jingdon jong ka jylla, da kaba pynbor ïa ki pateng baroh kawei jong ki khynnah ban duh jingnang jingstad.
Ha ki shnong kiba la shah ktah jur kum ka Pidia, Gampur, Donditumnar, bad Tamodi ha ka block Bijapur, bad Takilod, Ghotpal, Marrmeta, Sagmeta, Gomtair, bad Darbha ha ka block Bhairamgarh, ki skul ki la jah rngai syndon la palat arphew snem.
“Ka dei ka jingshai jong ka jingkyrmen ha ka Red Corridor barim, ngin noh synñiang ïa kaba bha tam kum ki ‘Shikshadoots’ jong ka imlang sahlang na ka bynta ki khynnah skul ha Bijapur”, la ong u Mahendra Tati, uba hikai ha ka shnong Kadenar.
Ban seng biang ïa ka jingpule ha ki jaka kiba jylliew bha ka donkam kham bun ban ïa ki hukum synshar, ka dawa ïa ka jingshaniah jong ki nongshong shnong. Ban pynurlong ïa kane, la jied ïa ki samla ba la nang la stad lajong kum ki ‘Shikshadoots’ (Ambassadors of Education) katkum ki rai ba pura jong ka Gram Panchayat, ba la bei pisa lyngba ka pisa jong ka District Mineral Foundation (DMF).
Khlem da sngewsih namar ka jingbym don ki jingtei kiba neh, ki nongshong shnong ba marjan ki la ïatreilang bad ka bor synshar ban shna ïa ki ïing rit ba la ker da ki dieng (Jhopdis) ba shipor khnang ba ki klas kin lah ban sdang mardor.
Ka bor synshar distrik ka la dep ban pynbiang ïa ki tiar pule ba kongsan, ki jingdonkam ha ki jingpule, ki kot pule, bad ki Black Board bad ki Uniform, katba ka jingmang bad ka jingpyndep ban shna ïa ki ïing skul kiba bha ba neh ka dang ïaid shakhmat, ong u Collector.
