New Delhi, Naitung:
U Myntri ka tnat ki kam pohïing jong ka sorkar pdeng u Amit Shah ha ka sngi Saitjaiñ u la ong ba ka BJP ka buh ïa ka jingmyntoi jong ka jaitbynriew, ki samla bad ki samla pule halor kano kano ka kyrdan, hadien ka jingiehnoh kam jong u Myntri ka tnad pule puthi jong ka sorkar pdeng u Dharmendra Pradhan hapdeng ka jingïakynad halor ka jinglait tuh ki jingkylli jong ka NEET.
U Pradhan u la hiar shuki ha ka step jong kane ka sngi namar ba ka sorkar ka mad ïa ka jingeh kaba jur bha halor ka jingpynïaid ïa ka jingkynnoh ba la don ka jinglait tuh jong ki jingkylli bad ki jingïakhih jong ki samla pule da ki taïew.
“Ka sorkar u Modi ka burom ïa ka jingsngew jong ki samla jong ka ri bad ka shimkhia ban pyntreikam ïa ki jingpynkylla kiba donkam pyrshah ïa ka jinglait jingkylli,” la ong u Shah ha ka jingthoh ha ka rynsan X ha ka miet jong ka sngi Saitjaiñ.
“Na ka bynta ka BJP, ka jaitbynriew, ki samla bad ki samla pule jong ngi ki bat ïa ka jingkordor kaba kham khraw ban ïa kano kano ka kyrdan,” u la ong.
U Shah u la ïaroh ruh ïa ka jubab jong u Myntri Rangbahduh ka ri u Narendra Modi halor kane ka jingïakynad, da kaba ong ba ki rai jong ka sorkar kin pynkhlaiñ ïa ka jingkitkhlieh ha ka rukom pynïaid ïa ki eksamin.
“Ki rai ba la shim da u Myntri Rangbahduh ka ri ban pynthikna ïa ka jingpynshitom kaba tyngeh ïa kito kiba donkti ban pyllait tuh ïa ki jingkylli ki long kiba dei ban ai jingïaroh,” u la ong.
Haba pynpaw ïa ka por treikam jong u Pradhan, u Shah u la ai burom ïa u da kaba pynïaid shakhmat ïa ki jingpynkylla ba kongsan ha ka pule puthi, kynthup ïa ka jingpyntreikam ïa ka National Education Policy (NEP), ka jingpynheh ïa ki eksamin ha ki ktien tynrai, ka jingpynkhlain ïa ki Skul PM SHRI, ka jingkyntiew ïa ka jingpule digital bad ka jingpynroi ïa ki sap, bad ka jingpynbha ïa ka jingïatreilang hapdeng ki karkhana bad ki jaka pule.
“Ka jingpyrshang jong u ban pynlong ïa ka rukom eksamin kaba kham kynthup lang bad kaba pynshong nongrim ha ki khynnah skul ruh ka la long kaba sngewtynnad.”
Ka jinglong Myntri jong u ka long ka jingpynshisha ïa ka jingaiti lut jong u ha ka jingkut jingmut ban pynlong ïa ka India kum ka ri kaba la kiew bha,” u la ong.
