Guwahati, Risaw:
U Myntri Rangbah jong ka Assam u Himanta Biswa Sarma ha ka Sngi Palei, u la ong ba ka seng Bharatiya Janata Party (BJP) ka la ïoh palat 58.11 lak ngut ki dkhot bathymmai ha kane ka jylla, kum shi bynta jong ka jingpyntreikam ban khring ïa ki briew bad ban pynrung dkhot ïa kiba shabar hapoh ka seng.
Ha kaba ïadei bad kane, ka seng ka la shimkhia ban pynrung dkhot thymmai bad kiba dang pynthymmai naduh basdang jong u bnai Nailur, da kaba thmu ban pynkhlaiñ ïa ka bor jong ka ha kylleng ki 126 tylli ki Assembly konstitwensi jong ka jylla Assam.
Ha ka jingpyllait khubor ha ki Social Media, u Sarma u la pynpaw ïa ka jingjop kaba khraw jong ka Teok bad Titabor konstitwensi, ha kaba ki dkhot ki la don palat 40 hajar ngut ki briew kiba la pynïasoh ïalade sha ka seng.
“Da ki 58.11 lak ngut ki dkhot bathymmai, ka BJP ha Assam ka la jan poi sha ka 100 percent jong ka thong ba ngi la buh,” u la ong ha ka jingphah khubor ha ka rynsan X, da kaba ai jingïaroh halor ka jingpyrshang bad ki jingtrei shitom jong ki nongbud ka seng.
Ka seng ka la pynrung kyrteng ïa baroh ar, kata ki dkhot na ka bynta kiba dang thymmai bad kiba pynthymmai naduh basdang jong u bnai, Nailur, halor ka jingthmu ban pynkhlaiñ ïa ki jingpyntreikam jong ka seng ha ki 126 tylli ki Assembly konstitwensi, ka don jingthmu ruh ban pynïoh dkhot kiba ïaryngkat bad 75 percent na baroh ki vote ba ka BJP ka la ïoh ha ka ilekshon Lok Sabha ha u snem 2024.
Ha u snem ba la dep, ki don kumba 18 lak ngut ki briew kiba la soi kyrteng ban long ki dkhot jong ka seng BJP ha Assam.
