Raipur, Risaw:
Ka kynhun lehnoh CPI (Maoist) kaba la shah ñiew be-aiñ, ka la pynmih ïa ka kyrwoh khubor ha kaba ki la pynshisha ba ki la duh noh ïa ki 35 ngut ki para dkhot ha ka por ba don ki jingïasiat bad ki shipai pahara ha shi lynter ka jaka khappud hapdeng ki distrik jong ka Dantewada bad Narayanpur ha ka thaiñ ba shaphang Shathie jong ka Chhattisgarh kaba la jia ha ka 4 tarik, Risaw.
Kum ka jingpyntikna, la ong ba ka jingdon jong ki lehnoh Maoist kiba la shah pynïap ha ka jingïasiat ba markylliang ka la long 31 ngut, kaba bun tam kiba la shah pynïap ha ka jingpyntreikam ban ïakhun pyrshah ïa ki Maoist haduh mynta ha Chhattisgarh bad la kdew ba ka dei ka jingduhnong kaba khraw bha na ka bynta ki Maoist ha ka khana pateng jong ki ha ki sawphew snem jong ka jingïaleh pyrshah ha ka Bastar.
La ngeit ba ki la don saw ngut ki lehnoh kiba la don bynta ha ka jingïasiat bad ki shipai kiba lah ban shah pynïap na ki jingmynsaw jur jong ki, ha kaba kane ka la pynkiew ïa ka jingdon jong ki lehnoh kiba la ïap sha ki 35 ngut.
Ha ka jingthoh ba la phah sha ki lad pathai khubor la ong ba katei ka kynhun kaba la shah ñiew beaiñ, ka la jer kyrteng ïa ki para dkhot kiba la shah pynïap ha katei ka jingïasiat ha ryngkat ki kyrdan ba ki la bat hapoh ka seng.
Ki pulit ka Bastar hadien ka jingïasiat ha ka 4 tarik, Risaw, ki la suba ba ka kynhun lehnoh Maoist ka lah ban mad ïa ka jingduhnong kaba khraw na ka jingshah pynïap jong ki dkhot ka seng naba kine ki lehnoh ki ju rah ïa ki para dkhot kiba mynsaw ne ïa ki metïap jong ki ha ka por ba ki phet ban lait na ki jingshah pynibor ha ki shipai ïada ri.
Ha ka 16 tarik Ïaïong, 2024, ki la don kumba 29 ngut ki lehnoh Maoist kiba la shah pynïap, kane ka long ka jingduhnong kaba khraw kaba ha shwa ba la pyntroiñ da ki shipai ïada ri ha kawei na ka jingleit hiar thma kaba donbor kaba la thmu ha Kanker distrik, kaba don ha ka bynta ba shaphang Shatei jong ka Bastar. Ka jingpynbna ba la pynmih da ka East Bastar Divisional Committee jong ka kynhun CPI (Maoist) ka la pynpaw shai bad pynlyngkot kumno ki lehnoh ki la shah ker kut bad shah hiar thma ha ki shipai ïada ri.
U Myntri ka sorkar kmie uba dei khmih ïa ka tnat ki kam pohïing u Amit Shah kum shi bynta ban ai ka jingïaroh halor ka jingjop kaba dang shen ban ïakhun pyrshah ïa ki lehnoh kiba don ha ka thaiñ ba ju shah ktah jur ha ki kam pyntriem jong ki lehnoh ha Bastar u la kyntu ïa baroh kiwei pat ki jylla kiba shah ktah ha ki kam pyntriem jong ki lehnoh Maoist ha ka jingïalang ba la pynlong ban bishar bniah ïa ki rukom pyntreikam ha Delhi ban shim nuksa na ka rukom treikam jong ka Chhattisgarh kaba pyntreikam borbah khlem da don ki kynhun wad bniah, ki bor treikam katkum ka juk ba mynta bad kiwei pat ki kynhun ban ïasnohktilang ha kane ka jinglah jong ki ban ïakhun pyrshah ïa ki lehnoh.
Ki shipai ïada ri ha Chhattisgarh ki dang pynlong ïa ki jingpyntreikam ban ïakhun pyrshah ïa ki lehnoh Maoist hapoh ka jingsynshar kaba thymmai ha kaba la pynthymmai ïa ki rukom pyntreikam ban ïakhun pyrshah ïa ki lehnoh ha ki thaiñ ba ki la leh donbor.
