Hyderabad, Naiwieng:
Ka jingduhnong ha ka liang ka pisa namar ki kam runar ha ka cyber ha Telangana ka la hiar da 20.2% ha u bnai Kyllalyngkot-Nailur 2026 haba ïanujor bad kajuh ka por jong u snem ba la dep, katba ka pisa ba la khang ha ki Bank Account jong ki nongleh thok ka la kiew da 42.2%, katkum ka jingkheiñ jong ka Telangana Cyber Security Bureau (TGCSB).
Ka jingduhnong kaba la ïathuh ka la hiar na ka T.1,104.42 klur ha ki khyndai bnai ba nyngkong jong u snem 2025 sha ka T.881.72 klur ha kajuh ka por mynta u snem, kaba long ka jingduna kaba T.222.70 klur.
Katba ka pisa ba la buh ha ka bynta jong ki account jong ki nongleh thok ka la kiew na ka T.183.11 klur sha ka T.260.30 klur.
Ïa kine ki jingkheiñ la pynmih ha ka por ba ka TGCSB ka dang pynkut ïa ka jingpynsngewthuh paidbah ïa ka jingshngaiñ ha ka Cyber kaba la neh shibnai da kaba pynlong ïa ki pulit ba kin pynlong ïa ki jingleit khynra ha ka por miet ha ka 30 bad 31 tarik u Risaw.
Ka bureau ka la pynshong nongrim ïa ka jinghiar ha ka jingduhnong bad ka jingkiew ha ka pisa ba la pynsangeh ha ka jingpynsngewthuh paidbah kaba neh, ka jingpyntip kloi ïa ki jingleh thok bad ka jingïarap pisa kaba ïadei.
Ha u bnai Risaw, ka TGCSB bad ki tnat pulit ki la pynlong haduh 4,248 tylli ki prokram pynsngewthuh paidbah, kaba la poi sha ki 2,78,428 ngut ki briew ha kylleng ka jylla. Naduh u bnai Kyllalyngkot, la pynlong haduh 24,886 tylli ki prokram, kaba la pynsngew sha ki 13,74,119 ngut ki nongshong shnong.
La sdang ha ka 1 tarik u Risaw, kane ka jingpyntreikam ka kynthup ïa ki prokram leit shabar ha ki jaka pule, ki jaka paidbah bad ki jingïalang jong ki paidbah.
Ka TGCSB ka la ong ba ka dang pynbeit ïa ki jingpynsngewthuh paidbah katkum ki rukom ba ki nongleh kam sniew ha ka cyber ki pyndonkam bad ki kynhun kiba ki thmu.
