Bhubaneswar, Naiwieng:
U Myntri Rangbah ka jylla u Mohan Charan Majhi u la dep ban pynbna ha kine ki khyndiat sngi ïa ka jingïarap kaba pura na ka bynta ki briew kiba shah ktah ha ka erïong Arnab, da kaba pynjlan ïa ka jingïarap sha ki nongrep, ki longïing kiba la shah pynjulor ki ïing ki sem, ki trai jingri, ki nongtong dohkha, ki kynhun Self-Help Group (SHG) jong ki kynthei, ki nongthaiñ jaiñ bad ki nongkhaïi barit.
Kawei pa kawei ka longïing kaba shah ktah kan ïoh 50 kg u khaw bad Rs 2,500 kum ka jingïarap bakyrkieh. Ki nongrep kiba la mad ïa ka jingduh ki jingthung kaba 33 percent shaneng kin ïoh ïa ka Input Subsidy kaba T.8,500 shi hectare na ka bynta ki jaka bym don um, T.17,000 na ka bynta ki jaka ba ai um bad T.22,500 na ka bynta ki jingthung kiba neh slem, katkum ka jingthew kaba ar hectare.
Haba pynbna ïa kane ka song tyngka hadien ba la bishar bniah ïa ki lad jingïarap, ban pynbha bad ban bishar bniah ïa ki jingjulor ha ophis jong u Special Relief Commissioner (SRC), u Majhi u la ong ba ka sorkar ka angnud ban ai jingïarap sha baroh ki briew kiba shah ktah.
U Myntri Rangbah u la ong ba ka kynhun jong ki phra ngut ki dkhot jong ka Inter-Ministerial Central Team (IMCT) ka la hiar sha Odisha naduh ka 2 bad kan bteng haduh ka 4 tarik u Naiwieng ban bishar bniah ïa ka jingjulor na ka erïong bad ka jingshlei um kaba la wan hadien ha ki distrik kiba la shah ktah bha kum ka Ganjam, Gajapati bad Kandhamal. U Majhi u la ïathuh ba u ïakynduh man ka por bad ka sorkar pdeng bad u la ïakren halor kane ka jinglong jingman bad u Myntri ka tnat ki kam pohïing jong ka sorkar pdeng u Amit Shah.
Da kawei pat ka erïong, kaba kyrteng ka Murasu, kaba lah ban wanrah jingma, u Majhi u la bthah ïa ki kynhun sorkar kiba la buh ha ki jaka ba shah ktah ban sah hangtei bad ban bteng ïa ki kam ai jingïarap bad ban ïai buddien.
Hapoh ka song tyngka jong ka rep ka riang, ki nongrep kin ïoh jingïarap na ka bynta ban pynduh ïa ki shyiap bad ki jaboh ba la lang ha ki jaka rep ha ka dor T.18,000 shi hectare katkum ka jingïarap kaba rit tam kaba long T.2,200. Ka sorkar kan sam 1.75 lak tylli ki tiar thung symbai ba kynthup ïa 1.2 lak tylli ki tiar thung shyieng symbai, 5 hajar tylli ki tiar thung symbai pynmih umphniang bad 50 hajar tylli ki tiar thung jhur.
Na ka bynta ki nongrep pai, u Majhi u la ong, yn ai jingïarap kyrpang ha ka dor kaba T.27,500 shi hektar na ka bynta ban pyni ïa ka rukom thung ha ka jaka katkum ka jingdonkam jong ki nongrep lane ha ka dor kaba T.12,500 shi hektar na ka bynta ban pynïaid ïa ki jingthung.
U Myntri Rangbah ka jylla u la pynbna ruh ban ai Subsidy 75 percent ïa ki dawai Chemical bad bio-pesticides sha ki nongrep kiba shah ktah ha ka aïom Rabi 2026-27. Ïa ki ram mar rep Kharif ba lyngkot por ha ki jaka ba don ka jingduhnong mar rep kaba 33 percent shaneng yn pynkylla sha ka ram ba pdeng por.
Na ka bynta ki ïing kiba la julor pura bad kiba la julor jur, u Majhi u la ong ba yn ai jingïarap pisa kaba T.1.2 lak na ka bynta ki jaka madan bad T.1.3 lak ha ki jaka lum. Ki ïing Pucca bad Kutcha kiba la shah pynjulor shi bynta kin ïoh ïa ka bai lutksan kaba T. 6,500 bad T.4,000. Yn ai jingïarap T.8,000 na ka bynta ki ïing trep kiba la shah pynjulor, T.3,000 na ka bynta ki sem ri jingri bad T.2,500 na ka bynta ki jaiñ ki nep bad ki tiar ïing.
Ka jingsiew bai lutksan na ka bynta ka jingïap jong ki masi bad ki muid ba ai dud la buh ban long T.37,500 na ka bynta kawei ka mrad katba ki langbrot, ki blang bad ki sniang kin ïoh T.4,000. Kumjuh ruh yn ai jingïarap T. 32,000 na ka bynta ka jingduh ïa ki mrad bad ki nongri syiar kin ïoh T.100 na ka bynta kawei ka syiar katkum ka jingsiew kaba heh tam kaba T.10,000.
Ki nongtong dohkha kin ïoh bai lutksan na ka bynta ki lieng bad ki jar kiba la shah pynjulor. Ki nongri dohkha kin ïoh jingïarap haduh 1.75 lak shi hectare na ka bynta ki pung paidbah kiba la shah pynjulor, kynthup ïa kiba la ai wai da ki SHG.
Ka song tyngka ka ai ruh T.5,000 kum ka pisa bai symbai ba la pyndap sha ki SHG kiba dei hok kiba shah ktah. Ki nongthaiñ jaiñ bad ki nongtrei kti kin ïoh ruh T.5,000 marwei na ka bynta ban bujli ïa ki tiar bad sa T.5,000 na ka bynta ka jingduh ïa ki tiar pyndonkam.
Ki MSME bad ki nongkhaïi kiba shah ktah kin ïoh ram haduh T.12 lak, da kaba ai jingïarap 25 percent ïa ka ram kaba la buh pud haduh T.3 lak. Ki nongdie jingdie ha rud surok bad ki jaka bam ba shipor kin ïoh T.10 hajar, katba ki dukan bad ki jaka khaïi kin ïoh T.25 hajar.
U Myntri Rangbah ka jylla u la bthah ïa ka Odisha Lift Irrigation Corporation ban maramot ïa ki jaka ai um kiba la shah pynjulor ha ki shnong kiba shah ktah katkum ka jingbuh hakhmat eh bad ban pynbha ïa baroh ki Unit shwa ban sdang ka aïom Rabi.
