Ukraine, Risaw:
U President ka United States, U Joe Biden, ha ka Sngi Balang u la pynbna ia ka song jingïarap da ki tiar ïakhun ka ba la shongdor kumba $425 million kaban phah sha ka Ukraine. Ia kane u Biden u la kren ha u President ka Ukraine- u Volodymyr Zelensky, ha shwa ba yn leit phai noh sha Berlin.
Kane ka song jingïarap kan kynthup naduh ki tiar ïada na suiñ bad ki kali ïakhun thma bad la ong ruh ba u Biden u la pyntip ïa u Zelensky halor ki jingpyrshang jong u ban kyntiew ïa ka jingai jingkyrshan jong ka US sha Ukraine katba u dang bat ia ka shuki President jong ka US.
U Biden un sa pynlong ruh ïa ka jingïalang jong ki ri marjan bad ka Ukraine ha u Naiwieng katba u dang pyrshang ban pynskhem ïa ka jingkyrshan jong ki ri ka pyrthei ïa ka Ukraine hapdeng ka jingiakhun pyrshah jong ka ia ki jingleit thombor jong ka Russia.
Hynrei ym shym la kdew satia ïa kano-kano ka rai halor ka jing-ailad ne em ïa ka Ukraine ban pyndonkam ïa ki ‘namding ‘Long Range Ballistic Missile’ kiba lah ban siat jngai ba la shna da ki ri Sepngi bad u Biden um ju kren shai halor kane ka bynta naduh ki por ba la leit haduh kine ki sngi ruh.
Kane ka song jingïarap na ka US kaba $425 million ka kynthup ïa ki tiar ban ïada na suiñ, ki tiar siat na suiñ sha khyndew, ki kali thma bad ki tiar siat ba kongsan ban pyndap ïa ki jingdonkam ba kyrkieh jong ka tnat shipai ka Ukraine ha kane ka por.
Ha kajuh ka por, u Zelensky u la pyntip ha u Biden halor ka jingthmu jong u ban ïakhun tyngeh bad ba ka Ukraine ka dei beit ban jop ïa ka Russia. Kine ar ngut ki nongïalam ri ki la bthah ïa ki kynhun Myntri jong ki ban iatreilang shuh-shuh na ka bynta ki kam ki jam kiba dang sah baroh.
Haba iadei bad kane, u Zelensky u la ai khublei ruh ia ka US bad ong ba u sngew-nguh shi kat dei eh ia ki rai bad jingkyrshan jong u President ka US- u Joe Biden, ha ryngkat bad ka sorkar Congress bad kumjuh ruh ia ki paidbah nong America kiba la ai jingkyrshan radbah ia ka Ukraine hapdeng ka jingiakhun thma jong ka pyrshah ia ka Russia ban ïada ia u pud- u sam jong ka mynta la lai snem lynter.
Katkum ka jingbuh jingkheiñ antad, la ong ba ka United States da kumno-kumno ka la phah kumba $175 Billion eiei ki jingïarap sha Ukraine, lada shim kyllum ia ka jingai jingkyrshan jong ka US ia ka Ukraine naduh ba sdang ka thma tad haduh kane ka kynti.
