Shillong, Risaw 20
Ka Hynñiewtrep Youth Council (HYC) ka la pynpaw ïa ka jingsngew -khia na ka jinglah ban ïoh rung ki nong Bangladesh na Assam sha ka Jylla Meghalaya, hadien ba ka ïingbishar bahakhliehduh ka ri, ka Supreme Court ka la pynksan ïa ka kyndon 6A jong ka Citizenship Act, 1955, ba la wanrah kum shibynta jong ka Assam Accord.
Halor kane ka nongrim, ka jingïalang CEC jong ka HYC kaba la long ha ka sngi Saitjaiñ ha ophis treikam ka seng, ka la rai ban dawa na ka Sorkar Jylla ba kan leit tynruh biang ïa ka jingdawa ban pyntreikam noh ïa ka Inner Line Permit (ILP) na ka Sorkar Pdeng.
U President ka HYC Sengkmie u Bah Roykupar Synrem u la ong ba katkum ka hukum jong ka Supreme Court, ïa ki briew ba leit rung hadien jong u snem 1971 ha Assam, dei ban kem ïa ki bad ban phah leit phai biang na ka jaka ba ki wan. “Ka Assam Accord kan treikam tang hapoh ka jylla Assam, katba hangne ha Meghalaya pat ym don ïa ki aiñ ban ïada na ki nongrung beaiñ kum ka ILP lane ka NRC, ki briew ba rung beaiñ hapoh Assam hadien u snem 1971 kiba la sngewthuh ba kim don jaka shuh ha Assam bad shwa ban kin shah phah biang sha ka jaka ba ki wan, kaba itieng ka long ba ïoh kine ki briew kin pyrshang ban rung sha kane ka Jylla”, u la ong.
Une u Nongïalam ka HYC u la ong ba ka Sorkar ka dei ban shim ïa ka jingkitkhlieh bad shimkhia ban pynbor ïa ka Sorkar India ba kan pyntreikam noh mardor ïa ka ILP hapoh Meghalaya. Kawei pat ka mat ba ka HYC ka la dawa ka long ban don ïa ka National Register of Citizens (NRC) ban buh noh ïa u snem ot kyrteng naduh u snem 1971. Ha kaba ïadei bad ka Meghalaya Residents Safety and Security Act (MRSSA), u la ong ba ka seng ka dawa ban pyntreikam ïa ka MRSSA, 2020 namar ka MRSSA, 2016 kam lah ban ai jingïada.
“Ka jingdawa jong ngi naduh kaba nyngkong ka long ban pyntreikam ïa ka MRSS Amendment Act, 2020 lane ban pyntreikam noh ïa ka ILP,” la ong u Bah Roykupar.
Lah ban kdew ba ka ïingbishar Supreme Court kala pynksan ba ka kyndon 6A jong ka Citizenship Act, 1955 ka dei kaba ïeng katkum ka riti synshar ka Ri. Kane ka kyndon, bala wanrah ha u 1985 hapoh ka Assam Accord, ka buh ïa ka nongrim ban ai long nongshong shnong ïa ki katto katne ki poiwir ba wan shong shnong ha Assam.
Ka kyndon 6A jong ka Citizenship Act, 1955, bala pyntreikam ha u snem 1985, ka pynïapher ïa ki briew ba wan poi beaiñ sha Assam na Bangladesh ha ki lai bynta; kito kiba wan hapoh ka Jylla shuwa u snem 1966, kito kiba sah ha ka Jylla hapdeng u snem 1966 bad 25 tarik Lber, 1971 bad kito kiba wan ha ka Jylla hadien ka 25 tarik Lber, 1971.
Ïa ki briew ba wan hashuwa u snem 1966 dei ban kheiñ kum ki nongshong shnong ka India, kiba wan hapdeng u snem 66-71 dei ban nym pynrung ha ki Electoral Roll bad sa pynrung hadien 10 snem, katba ïa kiba wan hadien u snem 1971 dei ban wad bad ban beh katkum ki kyndon ka aiñ sha ki jaka ba ki wan.
