Guwahati, ïaïong:
U Myntri ka Parliamentary Affairs, u Kiren Rijiju, ha ka sngi Saitjaiñ, u la kynthoh ïa ka Congress bad khyndiat na ki seng pyrshah, kiba la khanglad ïa ka jingmynjur ïa ka aiñ jong ka Riti Synshar (131st Amendment) kaba thmu ban kyntiew ïa ka jingmihkhmat jong ki kynthei ha ki kynhun thaw aiñ.
Haba kren sha ki lad pathai khubor ha Delhi, u Rijiju u la ong ba ka jingbym lah ban mynjur ïa ka jingpynkylla ka long kaba “sngewsih jur,” da kaba pynskhem ba katei ka jingpynkylla ka la ktah jur ïa ki kynthei ha kylleng ka ri. U la kynnoh ba ïa katei ka Bill, kaba thmu ban pynkhlaiñ ïa ka jingïashim bynta jong ki kynthei ha ka Lok Sabha bad ki Ïingdorbar Thawaiñ jong ki Jylla, la khanglad namar ki “jingthmu saiñ hima sima” bad ka “jingmut jingpyrkhat ban kyntait ïa ki kynthei ïa ka hok jong ki.”
U Myntri u la pynskhem ba ka jingthmu aiñ ka dei ka sienjam kaba kongsan ban pynthikna ïa ka jingpynrung kaba kham bun ïa ki kynthei ha ki rukom shim rai jong ka jingsynshar. U la ban jur ba ka jingthmu jong ka jingpynkylla ka long ban ai ïa ki kynthei ïa ka sur kaba khlaiñ ha kaba thaw aiñ bad thaw ïa ki polisi.
U Rijiju u la kyntait ïa ki jingai jingmut ba ka jingbymlah jong ka Bill ka pyni ïa ka jingshah pynphaidien jong ka sorkar, ha ka jaka kata u la buh ïa ka jingkitkhlieh ha ki seng Pyrshah.
U la kynnoh ïa ka Congress bad ki paralok jong ka ba ki la pynlong ïa ka “jingpynshitom kaba jur” ïa ka daw jong ka jingpynkupbor ïa ki kynthei da kaba khanglad ïa ka jingpyntreikam ïa ka aiñ.
Shuh shuh, u la pynpaw ba ka jinglong jong ka Liang Pyrshah kan don ka jingktah ha ka saiñ pyrthei, khamtam eh ha ki kynthei nongthep vote. U la batai ba ka jingkhanglad ïa ka jingpynkylla ka long kaba pynsniew ïa ka dur jong ka Congress, da kaba kynnoh ba ka pynskhem ïa ki jingsngew ba pyrshah ïa ka hok jong ki kynthei.
U Myntri u la pynpaw biang ïa ka jingangnud jong ka sorkar ban kyntiew ïa ka jingbuh kyrpang ïa ki kynthei ha ki jaka thaw aiñ, da kaba pynpaw ba ka jingpynthikna ïa ka jingïarap kaba biang na ka bynta ki kynthei ka dang long kaba kongsan. U la kynthoh ruh ïa kaei kaba u la khot kum ka “jingrakhe” jong ka Liang Pyrshah ïa ka jingshah rem jong ka Bill, da kaba ong ba kam long kaba dei haba kheiñ ïa ka jingktah ïa ka jingïaryngkat shynrang bad kynthei.
