Bertina Lyngdoh
Hir hir phi beh na shiliang sha shiliang,
Ha lyngkha step i’u kba ruh phi kaweh;
Ka sngi ka shoh, ki stem ruh ki soh:
Kumjuh ruh ki pah ki ñiang kynjah.
Ka jingbeh jongphi,
Haba wut-wut ne hin-hin;
Phi pynkynmaw, ba ka tlang ka la jan. Ym tang ba phi pynkynmaw ba la wan ka tlang, Hynrei ban pynkhreh ruh ïa jingwan jong ka.
Ka synrai ka wan shisien shisnem, na ki saw aiom. Ka dei ka aiom kaba bud ïa ka aiom slap ne ka lyiur. Ka synrai ka dei kawei na ki aiom ïa kaba la pynïanujor ïa ka bad ka por jinglong rangbah u briew. Kumba u briew u bunkam ban pynkhreh ban ot bad thad i’u kba, ban pyndap ïaka kpoh te kumta ha ka jinglong rangbah ruh, bun kiei kiei kiba hap ban bahkhlieh.Te kum ki rangbah, kiba shim ïa ka jingkitkhlieh, bun kiba ngi hap ban ïaid lyngba bad ym baroh ngi long kumjuh. Ha ka jingbah khlieh kum ki rangbah ne ki kmie ki kpa, don ki khep ba ngim lah kyrda shuh tang lade hi ngi don kam lem ïa ka jingkyrshan kiwei pat kata lah ban long kiba ha ïing ha sem lane kiwei pat ki para mynsiem briew. Kat ba ngi dang dei tang ki briew, kaba mut ba ngi dang tlot kham tam eh ha ka jingïadei para briew jong ngi. Kumta, ngi ïakynduh ïa ki ba bun kiba kum kine. Na kane ka daw, haba lyer ka beh hin-hin, kum ha ka por synrai, kumjuh ruh ngin ïakynduh ïa ki briew kiba bha, ba jai-jai ba smgew thuh bad kiba don mynsiem. Haba lyer pat ka beh paswut, kumta ruh ngin ïa kynduh bad ki briew kiba duna ka jingsngew thuh, ki bym sngewthuh satia, kiba khor ha ka ktien bad kiwei de ki dak ki shin ki bym pynsngewtynnad ïa u briew. Namar kata, lada don lei sa i jingbahkhlieh kiba bun, ynda kynduh lei sa kum kine ki jingmad kiba hap ban ïaid lyngba, ka long shisha thik kum ka ‘er kawut. Haba bun than kum kine ki khep, ka kmie u kpa kim banse ban baw baw kum ban shu ong noh. Kumta, sngew ban ong, ba ka synrai ka hikai lupa ïa ngi ban long kiba la pynkhreh ïa kiei kiei kiba ngin sa dang hap mad lane ïa ki jingeh kiba la ap lypa ïa ngi. Haba ka jai jai ka lyer, kaba mut u briew u kmen, u biang, u suk, hynrei haba ka kawut pat, kaba mut ba kum ki briew ngim lah lait ban mad ïa ki jingeh. U briew u kmen bad khuslai haba por ka batai, kumjuh ruh ka jingbeh jong ka lyer.
