New Delhi, Risaw:
Ka sorkar Aam Aadmi Party (AAP) kaba la shakri “da kaba hok” ïa ki paidbah ka nongbah Delhi haduh 10 snem, da kaba leh shibun ki kam kiba ym don shuh da kawei pat ka lad ban pyrkhat bha ha ka ri kaba la lah ban leh, ong u heh nongïalam jong ka seng u Arvind Kejriwal ha ka Sngi U Blei.
U Myntri Rangbah barim jong ka Delhi, uba dang ïashim bynta ha ka ‘padayatra’ (ka jingïalap paidbah da kaba shu ïaid kjat) ha shwa ban pynlong ïa ka ilekshon Assembly kaba la buh ban long ha kaba sdang jong u snem ban wan, u la kyrpad ruh ïa ki paidbah ba kim dei ban thep vote ne ban ai jingkyrshan ïa ka seng BJP.
“Lada phi thep vote ïa ka BJP, phin hap ban peit la phi dei ban siew ïa ki Bill ne ban sumar ïa ki khun jong phi,” la ong u Kejriwal.
Kum ka jingkynthoh pyrshah ïa u heh nongïalam jong ka AAP, u President ka seng BJP ha Delhi, u Virendra Sachdeva, u la pynshisha ba u Kejriwal, u tip ba ka seng jong u, kan shah rem ha kane ka ilekshon ban wan bad dei na kata ka daw, ba u dang thawlad ban bsut ha ki jingmut jingpyrkhat jong ki briew da kaba pynklet ïa ka por bad ki jaka shaphang ka jingtreikam ki skhim jong ka sorkar jong u.
U Kejriwal u la kynnoh ruh ba lada ka AAP kan wan ha ka bor synshar ha Delhi, ka seng BJP kan pynsangeh noh ïa ki skhim ba ai jingkyrshan ei na ka bynta ka bai bording, ka bai sumar ban ïoh ïa ka koit ka khiah, ka bai lut ha kaba leit skul bad ka bai leit jingleit na ka bynta ki longkmie.
“Ka bai bording ka bym don ka jingbuhdor ne kaba ïoh ei ka la kylla long ka rukom na ka bynta ki nong Delhi mynta, kaei kaei kaba ym ju don ha kiwei pat ki jylla kaba long ka jingsngewsarong,” u la ong, da kaba kynnoh ba shwa ba ka AAP kan wan ha ka bor synshar, ka bai bording bunsien ka ju poi haduh T.10,000.
Ha ka jingai jubab halor ka jingshah kynnoh, u Sachdeva u la ong, “Ngi la ïai ban biang da kaba ong ba ym tang ban bteng ha ka jingai jingïarap ha ka ban ai jingmyntoi lyngba ka bording, hynrei ka jingmyntoi kan poi sha ki nongpyndonkam kiba shah kynthup ha ka kynhun jong ki pdeng briew ruh. Ngin pynthikna ruh ïa ka jingpynbiang ïa ka um kaba khuid na ka bynta baroh ki nongshong shnong jong ka Delhi.”
Da kaba kular ba yn map noh ïa ki bai um ba la pynkiew dor, u Kejriwal u la kyntu ïa ki paidbah ban jied ïa ka AAP bad ban ïarap ïa u ban long biang u Myntri Rangbah ka jylla.
“Ka ilekshon ka dei ban long ha u bnai Rymphang. Ngan sa lah ban map noh ïa kine ki bill ha u bnai Lber hadien ba ka seng kan ïoh ïa ka bor synshar,” u la ong.
Ki briew ki donkam ban kyrshan ïa ka jingpyrshang jong ka seng AAP ban tei ïa ka Delhi kaba kynthup lang ha kaba treikam bha bad kaba ïaid shaphrang, u la ong.
Haba ai jubab halor kane ka jingkren, u Sachdeva u la ong ba ki nongïalam ka AAP kum u Kejriwal ki tip bha ba ki la duh ïa ka jingïadei bad ki paidbah jong ka Delhi.
“Ka long shisha kaba sngewlehraiñ ba ha ka jingkut jong ka sorkar jong u, u Kejriwal u hap ban buh jingkyrpad man la ka sngi ha ryngkat ka jingong ‘ngi maramot ïa ki surok bad ki nala um’. Kane ka dei ka jingpdiang ïa ka jingshisha ba ym shym la don kano kano ka kam ban leh ha Delhi la palat khyndai snem,” la ong u nongïalam ka BJP.
