New Delhi, Risaw:
Ki pulit jong ka Nagpur ki la ithuh ïa uwei u briew uba dei u nongshong shnong ka Gondia kaba don ha Maharashtra uba donkti ha lyndet jong ki jingbyrngem pynbthei bom ba dang jia shen ïa ki liengsuiñ kiba la wanrah ïa ka jingkulmar ha ka rukom pyntreikam ïa ki liengsuiñ.
Ka kynhun ba kyrpang jong ki pulit ka Nagpur ka la ithuh ïa une u briew kum u Jagdish Uikey, u nongthoh jong ka kot ba batai shai halor ki kam lehnoh, uba la shahkem teng ha u snem 2021 ha kawei ka mukotduma, u la ong.
“U Uikey mynta u dang phet rieh na kti jong ka aiñ hadien ba la lap biang ïa kine ki email kiba dei ki jong u, ” la ong u heh pulit. Ka jingtohkit, ba la lam khmat da ka Deputy Commissioner of Police (DCP) ka Shweta Khed-kar, ka la lap ïa ki jingtip kiba bniah kiba pyni ba don ka jingïadei u Uikey bad kitei ki email.
U Uikey, ula phah ïa ki email sha ki bor sorkar bapher bapher, ba kynthup ïa ka ophis treikam jong u Myntri Rangbahduh (PMO), Myntri ka tnad Railway, u Myntri Rangbah ka Maharashtra, u Eknath Shinde bad u Symbud Myntri Rangbah jong u, ki ophis treikam jong ki liengsuiñ, u Director General of Police (DGP) bad ka Railway Protection Force (RPF), la ong u heh pulit.
Ha ka lah sngi U Blei, ki pulit jong ka Nagpur ki la pynkhlaiñ ïa ka jingpahara shabar ka ïing sah jong u Symbud Myntri Rangbah bad Myntri ka tnat ki kam pohïing u Devendra Fadnavis ha kane ka nongbah hadien ba u Uikey u la phah ïa ka email da kaba byrngem ban leh pyrshah lymda ailad ïa u ban pynpaw ïa ki jingtip barieh lyngba u Code kaba u la kam ba u la dep ban batai. U la kyrpad ruh ban ïakynduh ïa u Myntri Rangbahduh u Narendra Modi ban ïakren katkum ka jingtip jong u halor ki jingbyrngem lyngba ki kam pyntriem jong ki lehnoh, u la bynrap. Ka email jong u Uikey kaba la phah ha ka 21 tarik, Risaw sha u Myntri ka tnat Railway u Ashwini Vaishnaw, bad kaba la phah ruh sha u DGP bad ki RPF, ka la pynlong ban pynkhlaiñ ïa ki shipai pahara ha ki jaka sangeh rel, la ong u heh sorkar.
“La thaw ïa ka kynhun ba kyrpang ban kem ïa u Uikey,” u la ong bad bynrap da kaba ong ba shen yn sa ïoh kem ïa u.
Ha ki 13 sngi haduh ka 26 tarik, Risaw, ki la don palat 300 tylli ki liengsuiñ ba la pynïaid da ki kompeni jong ki nong India kiba la ïoh ïa ki jingbyrngem shah pynbthei bom ha kaba la pyntikna hadien ba ki dei kiba thok.
Kiba bun ki jingbyrngem ki dei kiba la pynmih lyngba ki Social Media, la ïathuh ki kynhun jong ki heh sorkar. Tang ha ka 22 tarik, Risaw, ki la don kumba 50 tylli ki liengsuiñ, kynthup ïa mar 13 tylli jong ka IndiGo bad ka Air India kiba la ïohpdiang ïa ka khubor byrngem buh bom, la ïathuh ki tyllong khubor.
