Kaba nyngkong eh ka dei na ka rukom ai jait shim jait na ka kmie ne kynthei. Kaba ar ka long ba ki kmie ki kpa ka kynthei ne kiba haïing hasem ki pdiang ïa u tnga bym dei Khasi kum u shongkha uba lah ban pyndap pynbiang ïa ka tnga Khasi. Kaba lai ka dei ka jing-ithuh ka District Council (KHADC) ïa ki khun shipiah ban long Khasi paka lyngba ka aiñ Khasi Hills Autonomous District (Khasi Social Custom of Lineage)Act, 1979.
Kaba saw ka dei ka jingpdiang la ka tang-jait ïa ki khun shipiah ban thaw thymmai da ka jait Khasi Pnar. Kaba san ka dei ka jingïashongkha khleh para bangeit lyngba ka balang ïoh kabu ki khun shipiah ban ai jait Khasi.
Bun ki briew ki shim kabu ïa kine ki mat ban ïoh pynrung Khasi ïa ki kharlieh kharïong.
Dei ruh na ka shongkha bar jylla kaba pynsum ïa ki khun na ka kmie Khasi bad ki kpa bym dei Khasi ban shim jait jong ka kmie. Kine ki mat ki ïuhroit ïa ka rukom ai jait jong ka kmie kaba pynlong bad pynïoh jait Khasi ïa ki khun na ki kpa bym dei Khasi.
Kumne keiñ ka jaitbynriew ka la shah hiar thma ha ka rukom ai jait shim jait na ka kmie. Kine ki long ka jingïohi jongnga kum u rangbah bad u ‘riew paidbah ha kaba ïa dei bad kane ka rukom ïoh jait Khasi ki skum khun shipiah.
C. B. Iawphniaw
