Itanagar, Naiwieng:
Ka seng Arunachal Democratic Party (ADP) ka la dawa ban phah toh-kit halor ka jingjyllei ka jingtih dewïong beaiñ ha Changlang bad Longding distrik jong ka Jylla.
Ka seng ka la dawa ban tohkit bniah ïa kine ki kam, khamtam kito kiba don ha kylleng ka par dewïong Namchik-Namphuk.
Ha ka jingthoh kaba thikna ba la phah sha u Chief Secretary jong ka Arunachal Pradesh, ka ADP ka la khot ban thaw ïa ka kynhun tohkit kaba kyrpang ban tohkit bniah halor ka jingnang bun jong ki jingtih beaiñ ïa u dewïong.
Ka seng ka la sei ruh ia ki heh sorkar, kiba kynthup ïa u Sub-Divisional Officer jong ka Kharsang, u Assistant Mineral Development Officer jong ka Kharsang, u ophisar jong ka Range Forest jong ka Namphai, bad u Ophisar-in-Charge jong ka Kharsang Police Station, da kaba kynnoh ba ki la leh bymsuitñiew bad phah ïa ki kaiphot thok sha u Deputy Commissioner jong ka Changlang.
Ka ADP ka pynpaw ïa ka jingdonkam bakongsan jong ka par dewïong Namchik-Namphuk, ka jingdon jingem kaba kongsan na ka bynta ka jingmih khajna bad ka roi ka par jong ka jylla.
Hynrei ka seng ka pynpaw ka jingsngewkhia kaba jur halor ka jingkylla jong katei ka par sha ka jaka jong ki kam be-aiñ, kaba la kynnoh ba la ai jingkyrshan bad ai bor ki runar ba ju khaïi martuh bad ki kynhun pyntriem kiba treikam ha ki thaiñ khappud jong ka Tirap, Changlang, bad Longding.
Ki jingkynnoh jong ka seng ki sdang naduh u snem 2007-2012, ha kaba ka Arunachal Pradesh Mineral Trading & Development Corporation Ltd (APMT&DCL) kaba dei jong ka sorkar jylla ka la don bynta bad ka National Mining Company Ltd ban tih dewïong na katei ka par.
Hadien ka jingai hukum jong ka Supreme Court ha u snem 2014, kaba la pyrkhat ban mang ïa ki 204 tylli ki Block dewïong, kynthup ïa ka Namchik-Namphuk, kum ki jaka ba la pyntrekam be-aiñ, la pynsangeh noh
Wat hapdeng ki jingkhanglad ha ka liang ka aiñ, ka ADP ka kyntait ba ka jingtih dewïong beaiñ ka la ïai bteng, ha kaba ki kynhun runar ba ju khaïi tuh ki la pyndonkam da ki kor ki bor kiba heh bad khlaiñbor na ka bynta ban tih dewïong bad pynsniew dur ïa ka mariang.
Ka seng ka la pynshisha shuh shuh ba ïa ka kynhun Anti-Rat Hole Mining Oversight Committee, ba la thung khnang ban lah ban khanglad ïa kine ki kam beaiñ kam shym la wanrah jingjop, ha kaba ka la phah da ki kaiphot thok kiba i kumba ki la ïamynjurlang ha kine ki kam.
Ka ADP ka pynpaw ruh ïa ka jingsngewkhia halor ka jingaiti dang shen ïa ka par dewïong Namchik-Namphuk sha ka Coal Pulz Pvt Ltd.
Katba ïa ka jingaiti la leh ha u bnai Nailar jong u snem 2023, ka seng ka kam ba ïa ki jingbit badonkam na ka bynta ban tih dewïong ym pat lah ban ai.
Ha ka shithi ba kyrpang ba la phah sha ka Special Investigation Cell (SIC), ka ADP ka la kyntu ban pynlong ïa ka jingtohkit kaba bniah halor kane ka kam bad ka la dawa ban pynngat ha ki kyndon aiñ ïa baroh ki briew kiba donkti ha ki kam tih beaiñ ïa u dewïong.
