Itanagar, Naiwieng:
U Myntri Rangbah jong ka Arunachal Pradesh u Chowna Mein u la leit jurip bniah ïa ka Riverfront Development Site bad bishar bniah ïa ki jingtei bapher bapher ba la pyntreikam hapoh ki project kum ka ïing basa, ka jaka sah na ka bynta ki nongleit ïaid riewblei bad kiwei kiwei ki jingtei kiba la don lypa ha Parshuram Kund jong ka Lohit distrik.
U la pyntip ba ïa ki project la mang pisa haduh `. 50 klur da ka sorkar jylla bad sa `. 50 klur da ka DoNER Ministry. Ki kam pynroi kiba dang ïaid shakhmat ki long halor ka jingthmu ban pynkylla ïa ka Parshuram Kund sha kawei na ki jaka leit ïaid riewblei kaba heh tam jong ka thaiñ Shatei-Mihngi. Nalor ka jingleit jurip ïa kane ka jaka, u Symbud Myntri Rangbah ka jylla u la pynlong ruh ïa ka jingïalang ban ïakren halor ka jingpynkhreh ïa ka Parshuram Kund Mela 2025 ka ban sa long shen.Ha kane ka jingïalang la don lang u MLA Tezu bad u Advisor, u Dr. Mohesh Chai, ADC Wakro, nalor kiwei pat ki nongmihkhmat ba la ïashim bynta.
U Mein u la ban jur ïa ka jingdonkam ban pynlong ïa ka Parshuram Kund Mela kaba jop, ban pynthikna ïa ka jingïakynduh kaba khlem jingeh na ka bynta ki lak ngut ki nongleit ïaid riewblei kumba la khmih lynti ba kin leit jngoh ïa kane ka jaka kyntang ha ka por lehkmen.
U la bthah ïa ki bor pynïaid distrik bad ïa ka Parshuram Kund Development Trust ban pynbiang ïa ka jaka sah ym duna ïa ka 2000 ngut ki briew ha ka shi miet ha baroh kawei ka Mela bad u la dawa ruh ban mang pisa `. 50 lak sha ka Parshuram Kund Development Trust na ka bynta ban pynïaid beit ïa ka Mela.
Ka Parshuram Kund Mela ka dei ka jingïalang kaba ju pynlong man la u snem ha u bnai Kyllalyngkot, kaba ïahap bad ka sngi rakhe ïa ka Makar Sankranti, kaba khring bha ïa ki nongleit ïaid riewblei kiba leit pan jingkyrkhu na u Lord Parshuram bad ïashim bynta ha ki jinglehniam bakhuid. U Mein u la pyntikna shuh shuh ïa ka jingangnud jong ka sorkar ban pynbha ïa ki jingtei bad ki jingdonkam ha ka Parshuram Kund ban pynngiam ïa ka jingbun ki nongjngohkai bad ban pynthikna ïa ka jingïakynduh kaba pynhun mynsiem ïa baroh.
