Jowai, Naiwieng 06
U MLA ka Amlarem, Bah Lahkmen Rymbui uba long ruh u Chief Adviser ka Sorkar Jylla ha ka 6 tarik Naiwieng u la plie ïa ka projek sam umbam kaba tip kum ka New Nonglamin Combine Water Supply Scheme (NNCWSS) ha ka jingïalang aiti ïa ka skhim kaba la long ha madan Remusan, Nongtalang, West Jaiñtia Hills District.
Ïa ka NNCWSS la pyntrei lyngba ka Jal Jeevan Mission (JJM) ha ka jinglut kaba kot T.13,19,62,750/- na ka bynta saw tylli ki shnong kumjuh ki marjan shnong.
Kine saw tylli ki shnong ki ban ïoh jingmyntoi na kane ka skhim ki kynthup ïa ka New Nonglamin, Nongtalang Mission, Nongtalang bad Amsohmeheleng. Nalor kine saw tylli ki shnong la pynrung thymmai ruh ïa ka shnong Kyrmia Padu bad ka Roman kiba don marjan bad ka Area Nongtalang.
Ïa ka tyllong um la ai sngewbha da ki Kur Lai Kpoh, Pohsnem, Pohlynjar bad Pohduna ha ka jaka kaba tip kum ka Umdot kaba jngai 9 kilomitre.
U Bah Lahkmen Rymbui ha ka jingkren u la ong ban ïoh ïa kano-kano ka jingdonkam hapoh ki shnong ki thaw hap ban mad ïa ki jingeh hynrei wat shim ïa ki jingeh kum ki diengpyngkiang ban khanglad ban trei na ka bynta ka bha ka miat jong ka imlang sahlang.
Haba kyntu ïa ki nongshong shnong, u Bah Lahkmen u la ong ka um ka dei kaba kongsan haduh katta-katta bad u la ban jur ïa ki nongïoh jingmyntoi ban don ka jingkitkhlieh bad kam trai ïa ka skhim da kaba sumar sukher ïa ki pipe um, ki jaka pynlang um na ka bynta ban bit ban biang ka shnong ka thaw.
Nalorkata u la pynpaw ruh ïa ka jingsngewnguh ïa ki heh ophisar jong ka tnat PHE kiba la trei shitom ban pyndep ïa kane ka projek ha ka por kaba biang, na ka bynta ban pynpoi ïa ka umbam umdih sha man ki longïing jong ki nongshong shnong.
U Principal Secretary ka Sorkar Jylla u SM Andaleeb Razi u la ong ka jylla Meghalaya ka la leh bha ha ka JJM bad ka jingtreikam jong ka mission, mynta, ka jingkheiñ ka la kiew palat 82% bad la lah ban pynpoi um ha ki ïing briew, bad u la ai khublei ïa baroh ki nongshong shnong kumjuh ïa ka tnat PHE na ka bynta kane ka jingjop kaba khraw.
Nalorkata u la ong, haba aiti ïa ka skhim kam mut ba ki shnong kin kit ïa baroh ka jingkitkhlieh hynrei ka dei ka jingïatreilang ryngkat ryngkat bad ka tnat, ka shnong bad dkhot Village Water & Sanitation Committee (VWSC) khnang ba ka um kumjuh ki tyllong um kin long kiba neh bad lah ban pyndap pynbiang um ïa ki nongshong shnong.
Ha kane ka sngi la donlang ruh ka Chief Engineer PHE ka Kong BM Lyndem, u Waheh Shnong Nongtalang Mission Bah ST Rymbui, Waheh Shnong Nongtalang Bah M Lyngdoh, Waheh Shnong New Nonglamin Bah Sanbor Nonglamin, ka Secretary Shnong Amsohmeheleng Kong Elgina Myrchiang ha ka jingïalang kaba la pynïaid da ka SDO PHE ka Kong D Ksoo.
Hadien ka jingïalang u kongsan u la plie ruh ïa u maw nongrim bad la pynphuh-pynphieng ïa ka jingïalang da ki jingshad bad jingrwai.
