Washington, Naiwieng:
Ka jingjop jong u Trump ha kane ka sien, ka la wanrah jingsyier bad buh jingma ia ki phetwir kiba don ha kylleng jong ka United States namar u Trump naduh ki por ialap ilekshon u la dep byrngem lypa ba un weng bad pynher krad lut ia baroh ki phetwir kiba khlem kot-khlem sla bad kiba la shu ioh rung naphang ha ka por ka jingkhmih jong ka sorkar u Biden baroh shi katta.
Haba iadei bad kane, la ong ba uwei u khynnah samla uba dang 22 snem ka rta bad uba pule ha Phoenix jong ka nongbah Arizona, u la pynpaw ia ka jingsheptieng hadien ba u la iohsngew ia ka jingjop u Trump bad u tieng ioh un shah phah mih noh na katei ka ri kaba u la leit khnang ban pyndep ia ka jingpule jong u.
Namar u la ong ba u la dep trei shitom baroh shi katta ban ioh shong ha katei ka nongbah bad u la trei shitom ban poi sha ka thong lyngba ka jingiohlad jong u ban leit pule ha US, khlem da mutdur ba u Trump un wanrah ia kum kitei ki rai ki ban ktah jur ia ki paidbah nongwei ba nabar ka US.
Ia utei u khynnah pule la kha ha Mexico bad u la ju im hapoh United States ha ryngkat ki bahaiing- bahasem jong u naduh ka por mynba u dang don 4 snem ka rta.
