New Delhi, Naiwieng:
Kiba bun ki kynhun jong ka tnad Enforcement Directorate ha ka sngi Palei ki la pynlong ïa ka jingleit khynra ha ki 19 tylli ki jaka jong ki nongdie mar kiba die ïa ki mar jong ki ha ki jaka khaïi pateng jong ka Amazon bad Flipkart.
Ïa kane ka jingkhynra la pynlong ha Delhi, Bengaluru, Mumbai, Hyderabad bad Panchkula.
Uwei u heh sorkar u la ong ba ka kynhun ED ka la rai ban sdang ïa ka jingtohkit jong ka katkum ki kyndon jong ka Foreign Exchange Management Act (FEMA) katkum ka jingujor ba ki jaka e-commerce ki pynkheiñ ïa ki kyndon FDI (Foreign Direct Investment) jong ka India da kaba ktah beit ne khlem beit ïa ka dor die ïa ki mar ki mata lane ki jingshakri bad ban ai ïa ka jaka ïalehkai kaba ïaryngkat ïa ki nongdie jingdie.
“Halor ka jingujor jong ki, ka ED ka la thaw bun tylli ki kynhun bad ka la rai ban pynlong ïa ki jingkhynra hadien ba la ïatreilang ha ka step jong ka sngi Palei” la ong uwei u heh ka kynhun wad bniah.
Ka tyllong khubor ka la ïathuh ba ka ED ka la bishar bniah ïa ki kot ki sla kiba la ïoh kurup ha ka por ba ki la khynra ha ki jaka kiba don jingïadei bad ki 8 ngut ki nongdie marbam, ki bym shym la pynpaw kyrteng haduh mynta.
Haba la iakynduh ïa u nongaiktien jong ka Amazon, u la kyntait ban kren eiei, katba ka Flipkart, kam shym la jubab ïa ki jingkyrpad ban ai jingmut eiei.
Katba ka seng jong ki nongkhaïi ka Confederation of All India Traders (CAIT) ka la pdiang sngewbha ïa kane ka jingleh jong ka kynhun ED.
“Ka CAIT lem bad katto katne kiwei pat ki seng khaïi pateng, ki la rah ïa kine ki mat ha kine ki khyndiat snem ba la dep”, la ong u Secretary General ka CAIT uba dei ruh u MP ka BJP na Delhi u Praveen Khandelwal ha ka kyrwoh khubor.
U la kynnoh ba ka Competition Commission jong ka ri India (CCI) ka la pynmih ruh ïa ki jingpynbna pynshitom ïa ki jaka die e-commerce bad ki nongdie “kiba jied” jong ki namar ba ki leh ïa ki kam pyrshah ïa ka jingïakhun kiba la ktah jur ïa ki nongkhaïi rit bad ki dukan kirana.
Ka CAIT bad ka seng jong ki nongdie mobile ka AIMRA ki la ujor ruh sha ka CCI ha ki por ba la dep, da kaba pan ban pynsangeh noh mardor ïa ka jingtreikam jong ki Platform, da kaba kynnoh ba ki kompeni ki don bynta ha ka jingbuh dor kaba heh bad ka jingkamai pisa ban tyrwa na ka bynta ka jingbuhdor halor ki mar ki mata.
