Bengaluru, Naiwieng:
U Myntri ka sorkar kmie, u HD Kumaraswamy, u la kynthoh pyrshah ïa u Symbud Myntri Rangbah jong ka Karnataka u DK Shivakumar, da kaba kynnoh ba u la pynsniew ïa ka jingim jong ki dkhot ka kynhun jaitbynriew Ganga Matsya, kiba la im shisien ïa ka jingim kaba suk, da kaba tong dohkha ha ki pung.
Ha ka por ba u ïalap ilekshon na ka bynta u kyrtong ka NDA u Nikhil Kumaraswamy ha ki khyndiat sngi jong ka taïew ba la lah, ha ka shnong Karekoppa ha Channapatna, u Kumaraswamy u la pynpaw da kaba ong, “Ki jaitbynriew Ganga Matsya ki shaniah ha ki pung na ka bynta ka jingim jong ki, ha kaba ka kam ri dohkha ka long ka lad kamai ba kongsan jong ki. Ki pung ki long kum ka kmie jong ki. Hynrei, ka hok ri dohkha ha kine ki pung la die lilam bad la aiti ha ki kynhun kiba donbor, ha kaba ka la iehnoh ïa ki Ganga Matsya, kiba la shaniah ha ki pung da ki pateng bynriew, ba kin mih ban ïakhih sha ki lynti synkien,” u la pynpaw da ka jingsngewsih.
U Kumaraswamy u la pynthikna ba yn sa shim ïa ki sienjam ban pynrung ïa ki jaitbynriew Ganga Matsya ha ka thup Scheduled Tribe (ST).
“Kane ka jaitbynriew ka dei hok ban ïoh ïa ka jingmihkhmat ha ka saiñ pyrthei,” u la ong da kaba kdew ïa ka jinglong myntri mynshwa jong u DT Jayakumar na ka seng jong u.
Hynrei u Kumaraswamy u la kam ba ki lad ki lynti na ka bynta ka imlang sahlang ki la nang duna dang shen, da kaba kular ban pyrshang da kaba shisha ban pynrung ïa ki ha ka kyrdan ST. Kane ka jingjia ka wan ha shwa ka ilekshon shiteng samoi ka ban sa wan ha Channapatna, kaba la buh ban long ha ka 13 tarik u Naiweng, ha kaba u kyrtong ka NDA, u Nikhil Kumaraswamy, u don ha ka jingïakhun ilekshon pyrshah ïa u kyrtong ka Congress, u CP Yogeshwara, uba dang shen, u la rung sha ka Congress hadien ba u la iehnoh ïa ka seng BJP.
Ka ilekshon shiteng samoi ha ki 48 tylli ki konstitwensi ka dei kaba la saphriang ha ki 15 tylli ki jylla kiba kynthup ha Assam, Bihar, Chhattisgarh, Gujarat, Karnataka, Kerala, Madhya Pradesh, Maharashtra, Meghalaya, Punjab, Rajasthan, Sikkim, Uttar Pradesh, Uttarakhand bad West Bengal. Kham mynshwa ha ka 15 tarik, Risaw, ka Election Commission of India (ECI) ka la pynbna ïa ka jingthep vote shiteng samoi na ka bynta 48 tylli ki Assembly konstitwensi bad ar tylli ki Parliamentary konstitwensi ki ban long ha ki ar tylli ki bynta ryngkat bad ka ilekshon sha ka Assembly jong ka Maharashtra bad Jharkhand.
Ka jingthep vote jong ka bynta kaba nyngkong, kaba kynthup ïa ki 47 tylli ki Assembly konstitwensi bad ka Wayanad Parliamentary konstitwensi ha Kerala kan long ha ka 13 tarik, Naiwieng.
Ka bynta kaba ar kan long ha ka 20 tarik, Naiwieng na ka bynta ka Kedarnath Assembly konstitwensi ha Uttarakhand bad ka Nanded Parliamentary konstitwensi ha Maharashtra. Ka jingñiew ïa ki vote kan long ha ka 23 tarik, Naiwieng.
