New Delhi, Naiwieng:
U nongïalam jong ka seng Congress u Mateen Ahmed bad uba la long MLA la san sien na Seelampur, u la pynïasoh ïalade sha ka seng AAP ha ka Sngi U Blei, hadien katto katne sngi ba u khun bad ka pyrsa jong u, ki la leit sha ka seng ba la ïalam da u Arvind Kejriwal.
U nongaibuit jong ka seng AAP u Kejriwal u la pyntikna ïa kane ka jingpynïasoh seng jong u nongïalam ba pawkhmat jong ka seng Congress ha Delhi. “U Chaydhary Mateen Ahmed u la shakri ïa ki paidbah da kaba u shong ha ka thaiñ Yamuna-paar”, la ong u Kejriwal ha ka jingthoh ba la phah ha ka rynsan X katba u dang pdiang sngewbha ïa u nongwan rung ba khatduh eh ha ka seng.
Ha ka 29 tarik, Risaw, u khun jong u Ahmed u Chaudhary Zubair Ahmed bad ka kurim jong u kaba long ka Councillor ka Shagufta Chaudhary ki la pynïasoh bad ka seng AAP. Ka seng AAP, ha kajuh ka por ka la mad ïa ki kynrum-kynram, namar ba u riew saiñpyrthei ba la rim bha, u Harsharan Singh Balli, u la mih noh na ka seng bad kyntiap sha ka seng BJP ryngkat bad u khun jong u, u Gurmeet Singh.
U Balli uba la long MLA jong ka seng BJP la saw sien na Harinagar konstitwensi ha West Delhi, u la shakri kum u Myntri hapoh ka sorkar jong u Madan Lal Khurana. Hadien kane u la pynïasoh noh bad ka seng AAP.
U MLA barim u la rung sha ka seng BJP ha ryngkat ka jingdonlang u President jong ka seng na Delhi u Virendra Sachdeva bad ki para dkhot barim jong u ha ka seng u Subhash Arya bad u Subhash Sachdeva. Ka ilekshon Assembly ha Delhi kan sa long ha u bnai Rymphang jong u snem ban wan.
