Mumbai, Naiwieng:
Ka seng Congress ha Maharashtra hynnin ka sngi ka la pynbna ba ka la weng ïa ki 22 ngut dkhot na ka ilekshon Assembly na ka bynta ki 6 snem namar ki jingdon bynta jong ki ban leh ïa ki kam ba pyrshah seng, la ïathuh ka tyllong khubor ba la wan na ka seng.
Kine ki dkhot ki dei ki kyrtong ki ban ïakhun ilekshon na ki 22 tylli ki konstitwensi bad ba ki la pyrshah halor ka jingpynrung kyrteng jong ka Maha Vikas Aghadi ha ka ilekshon ka ban long ha ka 20 tarik, Naiwieng.
Ki nongïalam kiba kham pawkhmat kiba kynthup ïa u Myntri barim u Rajendra Mulak, ki la ïakhun na Ramtek, u Yagnyavalk Jichkar na Katol, u Kamal Vyawhare na Kasba, u Manoj Shinde bad u Suresh Patil na Kopri Pachpakhadi, bad u Aaba Bagul na Parvati.
U Anandrao Gedam, Shilu Chimurkar, Sonal Kove, Bharat Yereme, Abhilasha Gavature, Premsagar Ganvir, Ajay Lanjewar, Vilas Patil, Aasma Javad Chikhlekar, Hanskumar Pandey, Mohanrav Dandekar, Mangal Vilas Bhujval, Manoj, Vijay Khadse, Shabir Khan, Avinash Lad, Yagvalya Jichkar, Raju Jhode, and Rajendra Mukah ki la long kiwei pat ki nongïalam kiba la shah weng shipor na ka seng. Ka Maharashtra kan sa pynlong ïa ka jingthep vote ha ka 20 tarik, Naiwieng na ka bynta ban jied ïa ki 288 ngut ki dkhot sha Legislative Assembly.
Ka kynhun synrop Mahayuti, kaba kynthup ïa ka seng BJP, ka seng Shiv Sena jong ka kynhun u Eknath Shinde bad ka seng NCP jong u Ajit Pawar, ki la long pyrshah halor ka kynhun Maha Vikas Aghadi, kiba kynthup ïa ka seng Shiv Sena jong u Uddhav Thackeray, ka seng NCP jong u Sharad Pawar bad ka seng Congress.
Ïa ki nongjop yn sa pynbna ha ka 23 tarik, Naiwieng.
Ha ka ilekshon Assembly jong u snem 2019 ha Maharashtra, ka seng BJP ka la jop ha ki 105 tylli ki konstitwensi, bad ka seng Shiv Sena ka bym pat shah phiah ka la jop ha ki 56 tylli bad ka seng Congress ka la jop ha ki 44 tylli ki konstitwensi.
Ha u snem 2014, ka seng BJP ka la jop ha ki 122 tylli ki konstitwensi, ka Shiv Sena ha ki 63 tylli bad ka seng Congress da 42 tylli.
