Ranchi, Naiwieng:
Ka Enforcement Directorate (ED) ha ka Sngi Ba-ar ka la leit ban pynlong ïa ka jingkhynra sha kiba bun tylli ki jaka kiba don ha Jharkhand kaba la jan dei ban pynlong ïa ka jingthep vote, lait noh na West Bengal, ha ka jingtohkit halor ka jingkamai spah bymhok kaba ïadei bad ka jingkynnoh ba ka la mih na ka jingwan rung be-aiñ ki nong Bangladesh.
Ki la don baroh kumba 17 tylli ki jaka kiba la shah khynra ha ki ar tylli ki jylla ba marjan da ka ophis treikam ha Jharkhand jong ka kynhun tohkit jong ka sorkar kmie. Lah ban kdew ba ka ilekshon Assembly ha Jharkhand, ka dei ban sdang ha ka Sngi Balang kata mynta ka sngi, ka 13 tarik Naiwieng, da ka jingthep vote kaba nyng-kong.
Ka bynta kaba bud kan long ha ka 20 tarik u Naiwieng. La buh pynlong ruh ïa ka ilekshon shiteng samoi na ka bynta hynriew tylli ki Assembly konstitwensi mynta ka sngi.
Ha u bnai Nailur, kane ka kynhun tohkit ka la buh jingujor mukotduma hapoh ka aiñ Prevention of Money Laundering Act (PMLA) ban tohkit ïa ka jingwan rung tuh bad khaïi jong ki ba bun ki kynthei na Bangladesh sha Jharkhand, kaba la pynlong ïa ka jingpynmih ïa ka pisa ba la dawa kaba dei ka pisa bamsap.
Ïa kane ka mukotduma la mudui halor ka jingujor jong kawei ka briew kaba la ïathuh ba ka la rungtuh shapoh ka ri na shiliang u pud u sam jong ka India bad Bangladesh da ka jingïarap jong ki nongkhaïi beaiñ ban wad kam, la kynnoh ba ka la jer kyrteng kumba san haduh hynriew ngut ki kynthei kum ki nongleh kam sniew kiba la shah kem ha ka por ba ki leit khynra ha kawei ka jaka jngohkai pyrthei ha kane ka thaiñ.
Ka kynthei kaba la aiti ïa ka ejahar ka la lait phet na kawei ka jaka sumar ba la buh ïa ka bad poi ha ka thanat pulit.
La lap ruh ba kawei na kitei ki kynthei, ka la pyndonkam ïa ka Aadhaar Card “thok”.
U Myntri Rangbahduh u Narendra Modi bad kiwei kiwei ki nongïalam jong ka seng BJP ki la kynnoh ïa ka sorkar jylla ba ka ïarap ïa kum kane ka jingwan rung tuh kaba ïalam sha ka jingpynkylla ïa ka jinglong-jingman jong ki ‘riewlum ha ki jaka ba bun ki riewlum ha ki thaiñ Santhal Pargana bad Kolhan ha ka jingai jingkren jong u ha ka jingïalap ilekshon kaba dang shen.
Ka rai jong ka High Court ban thaw ïa ka kynhun kaba khlem shah liang ban peit ïa ka jingjyllei jong ki nongwan buhai shnong na Bangladesh ka la ïakynduh jingeh na ka jingshah kynthoh na u Modi halor ka jingbym pdiang jong ka Sorkar Jharkhand ïa ka jingeh jong ka jingwan rung tuh.
Ka bynta kaba nyng-kong jong ka ilekshon Assembly ka la long na ka bynta ki 43 tylli konstitwensi mynta ka sngi, katba ka bynta kaba ar na ka bynta ki 38 tylli ki konstitwensi kan sa long ha ka 20 tarik, Naiwieng.
Ka ECIR (Enforcement Case Information Report) kaba la mudui da ka kynhun tohkit hapoh ki kyndon bapher-bapher jong ka PMLA ka mih na ka ejahar jong ki pulit ka Jharkhand kaba la mudui ha ka jaka treikam jong ki pulit ka Bariyatu ha ka nongbah Ranchi ha u bnai Jylliew.
