Bhubaneswar Nailur:
Ka jingpur jong ka jingpang stem ne Jaundice ha kawei ka jaka sah jong ki khynnah kynthei jong ka sorkar ha Rebadi hapoh ka Kolnara block jong ka Rayagada distrik ka la pynlong ïa ki bor pynïaid ban sngew lyngngoh, ha kaba la ïathuh ba palat 70 ngut ki khynnah skul ki la ïoh ïa ka jingpang hapoh 10 sngi bad kumba 100 ngut pat ki la pyni ïa ki dak ki shin kiba ïadei bad ka jingpang.
Kane ka skul kaba la pynïaid da ka tnad ST & SC Development ka don kumba 370 ngut ki khynnah kynthei. Kiba nyngkong eh kiba ïoh pang ki dei ha ka 7 tarik u Nailur, ha kaba hynriew ngut ki samla pule ki la ïoh ïa ki dak kiba kynthup ïa ka jingkylla rong stem jong ki khmat bad ka jingprie. Katba nang bun ki khynnah pule kiba pang, la pyntreikam ïa ki kynhun ka koit ka khiah bad la shim ïa ka snam jong baroh.
Ki la don kumba san ngut ki khynnah pule kiba la shah sumar ha hospital ha ka sngi Ba-ar. Katba saw ngut kiwei pat ki la shah sumar ha Rayagada district headquarter Hospital, sa kawei pat ka khynnah kynthei ka la shah pynkynriah sha MKCG Medical College and Hospital ha Berhampur. La pyllait noh ïa ka na ka jaka ai jingsumar ha ka sngi Balang.
