Aizawl, Naiwieng:
Kiba bun na ki seng saiñ pyrthei ha Mizoram, kynthup ka seng kaba bat ïa ka jingsynshar ka Zoram People’s Movement (ZPM), ki la pynrem jur halor ka jingshah pynïap jong kawei ka briew ha ka shnong Zairon Hmar kaba don ha Jiribam distrik ha Manipur ha ka 7 tarik, Naiwieng.
Kane ka briew kaba la 31 snem ka rta ka dei kaba la shah pynïap ha ki briew ki bym shym la lah ban ithuh ha ka shnong Zairon Hmar kaba don ha Jiribam distrik ha ka miet jong ka Sngi Palei.
Ki la don kumba hynriew tylli ki ïing kiba la shah thang ha kaba ïadei bad ka jingjia.
Ïa ka met ba la ingkhong jong kane ka briew la lap da ki nongshong shnong ha ka por shiteng sngi jong ka Sngi Thohdieng.
Ka seng ZPM ha kaba ïadei bad ka jingpyllait khubor jong ka ka la pynrem jur halor ka jingpynïap bashyrkhei ïa kane ka briew.
Ki seng ka liang pyrshah kiba kynthup ïa ka Mizo National Front (MNF) bad ka seng Congress ruh ki la pynrem jur halor ka jingthang ïa ki ïing ha ka shnong Zairon Hmar nalor ka jingpynïap ïa kane ka briew.
Ka seng MNF ka la ong ha ka jingthoh kumne, “Ka long kaba sngewsih bad sngewshyrkhei shibun halor ka jingjia naba mynta la ïaleh ban pynphai ïa ka shongsuk-shongshngaiñ…”.
Ka seng ka la kyntu ruh ïa ki heh ba dei khmih ba kin pynkloi ha ka ban leh ei ei halor kane ka jingjia bad ban pynshitom da kaba tyngeh pyrshah ïa ki runar kiba la donkti ha kane ka kam kaba sngew shyrkhei.
