Imphal, Naiwieng:
Kumba la ïathuh ka tyllong khubor la ong ba ki la don kumba 11 ngut ki briew kiba la shah suba ba ki dei ki lehnoh Kuki ki la ïap ha ka jingïakhun pyrshah bad ki bor pahara hadien ba la hiar thma ïa kawei ka ktem jong ki pulit ka Central Reserve Police Force (CRPF) ha Jiribam distrik ha ka Lah Sngi U Blei.
Ki ‘riewkieng atiar ki la hiar thma ïa ka jaka treikam jong ki pulit ka tnat CRPF ha Jakuradhor bad ha Borobekra Police Station ha Jiribam. Uwei u pulit CRPF ïa uba la tip kyrteng kum u Sanjeev Kumar u la mynsaw ha katei ka jingshah thombor.
U Kumar uba la mynsaw na ka jingdei kuli u la shah pynkit noh sha Silchar Medical College ha Assam bad u dang don hapdeng ka jingshah sumar. Ïa ar ngut ki briew kiba la noh rta la lap ba ki la ïap ha ka ïingsah jong ki kaba la shah thang da ka ding ha ki lehnoh ha Jiribam.
Ki pulit ka Manipur ha ka jingpyllait khubor ha ka rynsan X ki la ong, “Ïa kane ka jingthombor la pynphai kylla da ki pulit CRPF bad ki pulit Civil. Hadien 40 – 45 minit jong ka jingïasiat kaba jur, la lah ban tehlakam ïa kane ka jingjia.”
“Ka jingkhynra hapoh bad sawdong sawkun jong ka Jakuradhor, kaba hap hapoh Borobekra Police Station, Elaka Jiribam ka dang ïai bteng ban beh krad ïa ki lehnoh kiba la pynkhreh bad don ïa ki tiar siat. Ki kynhun ba la don bynta ban tehlakam bad ïakhun pyrshah ïa ki lehnoh ki kynthup ïa ki Assam Rifles, CRPF bad ki Pulit Civil Police, kine ki la leit sha katei ka jaka ba la jia ka jingthombor.”
Na ka liang ki seng bhalang Kuki ki la khot pakhang shnong ha ki jaka lum jong ka jylla ba Shatei-lam-Mihngi naduh ka por 5 baje mynstep haduh ka por 6 baje janmiet jong ka Sngi Ba-ar.
Ha ka taïew ba la dep, ki la don ar ngut ki ‘riew paidbah kiba la shah pynïap ha Manipur.
Kawei ka longkmie kaba 31 snem ka rta ka la ïap ha ka jingshah thombor ha Jiribam katba kawei ka longkmie kaba 34 snem ka rta ka la khlad noh na ka jingmynsaw hadien ba dei kuli ha Bishnupur.
