Bengaluru, Naiwieng:
U Myntri Rangbah jong ka Karnataka, u Siddaramaiah, u la leh ïa ka kam ka ban pynsah kynmaw ha ka pateng ha kaba u la leit jngoh ïa ka shnong ba shong ba sah ki riewlum Kerehadi ha Heggadadevana Kote (HD Kote), kaba u la pynlut por ar kynta bad kine riewlum. Kane kan pynsah kynmaw ba u la long u Myntri Rangbah banyngkong eh ban lah leh ïa kane.
Ha kane jingleit jngoh jong u Siddaramaiah u la sngap ïa ki jingeh jong ki riewlum kiba la slem bha, da kaba pynbeit ïa ki mat jingdawa ha ka jaka bad kular ban leh eiei. “Yn sa leh pynkloi ban pyntreikam kum shi bynta ban shim ïa ki sienjam kiba biang ha kaba ïadei bad ka jingthaw ïa ka Adivasi/Aranyavasi Development Corporation,” u la pynthikna.
Ka jingïashim bynta jong u Siddaramaiah ka wan kum shi bynta jong ka jingpyrshang kaba kham jylliew jong ka sorkar jong u ban ïakren halor ki jingdonkam jong ki jaitbynriew ba shah iehnoh beiñ bad ban weng ïa ki jingeh jong ki kiba la slem bha da ka jingïarap bad ka wanrah ïa ki rukom pyntreikam jong ka sorkar.
Ki riewlum, kumba ki la pynpaw ki la ong ba don napdeng jong ki, kiba khlem don bording bad khlem um bam um dih kaba biang da ki phew snem, kine ki la ïakren beit beit bad u Myntri rangbah ka jylla u Siddaramaiah. U la bthah ïa ki heh sorkar ban pynsted ïa ka jingpynïoh um bad bording, katba u dang shong ha madan bad ki nongïalam jong ki riewlum u Ganesh bad u Ramesh.
U District Collector u Laxmikant Reddy u la pynthikna ïa ki jingthmu ban weng ïa ki jingeh bad ong, “Ngin sa weng ïa ka jingeh ba ïakynduh ha ka liang ka um bam um dih bad ka jingpynpoi bording jong ka Kerehadi bad ki 8 tylli kiwei pat ki shnong hapoh shibnai.”
Ha ka jingïalang la ïakren ruh halor ki mat ba ïadei bad ka khyndew ka shyiap. Ki la don kumba katto katne ngut ki riewlum kiba la ïathuh ba watla ki don ka hok katkum ka aiñ ban rep ïa ki jaka rep kiba ki la rep da ki phew snem, hynrei ki ïakynduh jingeh na ka jingpyrshah jong ki heh ba dei khmih ïa ki khlaw bad ki jingkhanglad ban pyndonkam ïa ki tiar rep kum ki traktor.
“Ki riewlum ki dei ka bynta jong ka khlaw. Kim ju wanrah kano kano ka jingthut ïa ka khlaw, kumta kam dei ban don kano kano ka jingpynthut khlem da donkam”, la ong u Siddaramaiah. U la kular ban ïakren ïa kine ki mat ha ka jingïalang jong ka Wildlife Board ka ban sa wan, da kaba pynksan ïa ka rukom treikam kaba ïadei hapdeng ka hok jong ki riewlum bad ka jingsumar ïa ki khlaw ki btap. U Siddaramaiah, uba dei ruh u Chairman jong ka Wildlife Board, u la kular ban bishar bniah kumno ki rukom pyntreikam kin lah ban kyrshan kham bha ïa ka roi ka par jong ki riewlum khlem da pynthut ïa ki lad jingïada ïa ka mariang. U la pynthikna ïa ki paidbah ba “yn sa shim ïa ki rai kiba biang ha ka Wildlife Board” ban weng ïa ki jingeh jong ki.
Ki riewlum Kerehadi ki la kyrpad ïa ka jingshakri jong ka Adivasi Development Corporation, kaba lait na ka Nomadic Development Corporation. “Ngi dei ki Adivasi kiba shong ha kawei ka jaka ha khlaw. Kumta wat kynthup ïa ngi ha ka Nomadic Development Corporation,” ong uwei u dkhot jong ka jaitbynriew. Kum ka jubab, u Myntri Rangbah ka jylla u la pynskhem ïa ka jingkular jong u ban seng ïa ka kynhun kaba laitluid.
Haba ïakren bad ki khynnah riewlum, u Siddaramaiah u la pynshlur ïa ki ban bteng ïa ka jingpule, da kaba kdew kumno ka jingïaishah jong u hi ka la ïalam ïa u na ka jinglong nongkyndong sha ka ophis treikam jong u Myntri Rangbah ka jylla.
U la ïathuh ïa ka jingïathuhkhana shaphang jong u shimet, “U kpa jong nga ruh u la phah ïa nga ban pule ïa ka shad tynrai. Nga la long Myntri Rangbah mynta ka sngi namar ba nga la leh ïa ka Law Degree jong nga da ka jingminot.”
U la pynksan ïa ka jingpule kum ka lad ban kyntiew ïa ki jaitbynriew riewlum, da kaba ong, “Phi dei ruh ban ïoh ïa ka jingpule khlem da pep skul shiteng por.”Haba jubab ïa kawei pat ka jingkyrpad kaba la slem bha, u Siddaramaiah u la kular ban bishar bniah ïa ka rukom hikai skul Ashram kaba mynta. Ki riewlum ki la pan ban pynthymmai bad pynkylla ïa ka jingpule ha ki Ashram sha ka kyrdan Pre-University College (PUC), da kaba kdew ba ki jingai ba mynta ki leit tang haduh ka klas 8.
U Siddaramaiah u la ong ba un pyrkhat ïa kane ka jingpynheh, kaba lah ban plie kham bun ki lad ki lynti na ka bynta ki samla pule riewlum. Ïa kane ka jingwan jngoh jong u Siddaramaiah la rakhe da ki jaitbynriew riewlum Kerehadi, kiba la ïaroh ïa u kum u Myntri Rangbah ba nyngkong eh ban ïakynduh markhmat bad ki.
Ar pateng ki riewlum Kerehadi ki la ïashim bynta lang ha ka jingrwai bad jingshad kum ka jingburom ïa ka jingwan jngoh kaba pawnam jong u, da kaba pynpaw ïa ka jingkyrmen ba ki jingkular ba la ai kin wanrah ïa ki jingkylla kiba la ap slem bha.
