Imphal, Naiwieng:
Ki shipai pahara ki la ïoh ban kurup ïa ka jaka buh tiar siat bad pynbthei na Jiribam bad Churachandpur jong ka Manipur, la ïathuh ka tyllong khubor kaba la wan na ki pulit ha ka Sngi Balang.
Ki shipai pahara ha ka por ba ki pynlong ïa ka jing-leit kerkut bad ka jingleit khynra ha ki thaiñ Champanagar, Narayanpur bad Thangboipunjre jong ka distrik Jiribam ha ka Sngi Balang ha kaba ki la ïoh ban kurup ïa u Mortar ba 2 inshi, 36 tylli ki kuli bym pat pyndonkam bad san tylli ki song kuli ba la dep siat, la ïathuh ka tyllong khubor.
Na ka shnong H Kotlian kaba don ha Churachandpur distrik, ki bor pahara ki la ïoh ban kurup kawei ka suloi .303, kawei ka pistol 9mm, ar tylli ki suloi kiba kham tlot bor, ar tylli ki suloi kiba kham khlaiñ bad lah ban siat sha jngai, san tylli ki suloi AK 47, ar tylli ki suloi 9mm, saw tylli ki suloi 12 bore bad 18 tylli ki suloi 303 ba la pynwan dur, la bynrap ka jingthoh.
