Amlarem, Naiwieng 18
Ka Nanrhen Ryntih, Kudengrim Shmiapang YC, Mukhim Brother’s bad Jaraload SC ki la ïoh jingjop ha ka lympung ïalehkai Upper bad Lower Division Football Tournament ba la pynïaid da ka Amlarem Sub Divisional Sports Association (ASSA) ha madan Mini Stadium Ladjaplem, Amlarem.
Ha ka jingïalehkai jong ka Upper Division kaba la long ha ka Lah Sngi U Blei, ka Namrhen Ryntih ka la pynliem ïa ka Psadwar da 1-0 kol. Ïa kane kol la thep lyngba ka penalty da u Alfreedy Pohlong ha ka minit ka 51.
Haba phai sha ka Lower Division, ka Shmiapang YC ka la jop da 2-0 kol ïa ka Amsongrhong SC. Ïa kine ki kol la thep da u Shlur Manner ha ka minit kaba 12 & 43.
Kumjuh ka Mukhim Brother’s ka la pynliem ïa ka War Jaiñtia Veterans da 3-1. Ïa kine kol jong ka Mukhim Brother’s la thep da u Shemphang Langsiang (11 & 37) bad u Panvi Langshiang (32), katba ka shi kol jong ka War Jaiñtia Veterans la thep da u Chorbit Buam (35).
Ha kawei pat ka jingïalehkai ka Jaraload SC ka la pynliem ïa ka Sohkha Shnong da 1-0 kol. Ïa kane kol la ïarap pynthep da u rangïalehkai ka liang pyrshah u Ludister Tongper ha ka minit kaba 51.
