I. R. Dkhar
Ka jaitbynriew Khasi-Jaiñtia ka dei ka jaitbynriew kaba shu shah jem bad shah synshar beit ha kiwei pat ki jaitbynriew. Naduh ka jingïathuhkhana pateng-pakit, ka jaitbynriew Khasi-Jaiñtia ka dei ka jaitbynriew kaba shah pynbiej tang ha ka pisa. Ka kloi ban byndi ïa kat kaba don tang ha ka jingpynbiej ha ka pisa. Kim tip ïa kaei ka ban jia ïa ka lawei ïa ki khun ki kti, ïa ka longïing longsem, ïa ka jaitbynriew bad ïa ka imlang sahlang. Teng teng, tang ban bit ban biang ïalade, tang ban ïoh ïalade, ki kloi ban die, kaba mut ruh ban ïoh suk khlem da trei da ktah ne khlem da pynshitom ïa lade. Ngin peit ïa ka nuksa, balei ki bun ki Khasi kiba leh ïa ka ‘benami’ ban suk ïa ka ïohei khlem da pynshitom, khlem da trei da ktah hi. Ka jingjaituh ka dei kawei na ka ‘raibi’ ka pynlong ïa ka jaitbynriew ka bym roi, ka bym kiew shaphrang bad ka bym riewspah. Uwei u riewrangbah, u bym don shuh ha kane ka pyrthei, u ong, ka jaitbynriew Khasi, ka dei ka jaitbynriew kaba shu shah synshar beit ha kiwei. Lada synshar ha kiwei ka biang, hynrei lada synshar hi, la jot.
Ha kaba ïadei bad ka jingïakhih ki samla pule jong ka Skulbah North Eastern Hill University lem bad ka jingïa-snohkti lang ka NEHU-KSU Unit, ka dei ba ngi dei ban kyrshan bad ai khublei ïa ki samla kiba ïakhih na ka bynta ban weng noh ïa u P K. Shukla, Vice Chancellor ka NEHU bad U Registrar bad Deputy Registrar. ïa ki la thung ha ka kam da ka President ka ri India bad ïa ki Registrar ar ngut pat la thung da u VC. U don ka bor kaba la pynkhamti ha u. Ka NEHU students Union bad ka KSU-NEHU Unit ki ïakhih namar ka rukom treikam jong u kam ïadei satia bad ka jingtreikam (style of functioning) bad kawei ruh u leh shiliang ne pyrshah ïa ki tribal ne non-tribal tactics. Te hynrei ban weng ïa u bad ïa kiwei, ka dei ban dei tang da ka lad. Kata ka dei ban ïoh ïa u briew la jong, ne ka jaitbynriew Khasi-Jaiñtia la jong. Nga tharai, phi la ïa sngewthuh ïa ka jingdonkam ban ïoh ïa u parajait bynriew la jong. Ngi la ïohi ba ha bun ki kam, ka jaitbynriew Khasi-Jaiñtia ka shah synshar ha kiwei. Ka daw ka long ba ngim ïoh ïa u briew la jong. Te kumta ki samla jong ka skulbah NEHU bad KSU ki dei ban sngewthuh. Lada ym ïoh da u briew la jong, kiwei ki jaitbynriew nongwei ki leh katba mon. Ngi kynmaw ba mynshuwa, u Dr. Pakem (bam kwai ha dwar u Blei) u la bat teng ïa ka kam VC jong ka NEHU. Hadien jong u ym don shuh na ka jaitbynriew Khasi ne Jaiñtia ban ïoh ïa ka kam VC haduh mynta. Namarkata, ki samla pule NEHU bad ka KSU ki dei ban pyrkhat ha kata ka rukom ban ïoh ïa u briew la jong. Haba ïadei bad kane, ngi ïohi ba ym tang ha NEHU, hynrei ha bun ki kam baheh-baheh, la rung da ki non-tribal ha kane ka Jylla jong ngi. Khyndiat ngut ki Khasi-Jaiñtia bad Garo kiba bat ïa ki kyrdan ophisar ha ki Department bapher bapher.
Nga ai kawei ka nuksa ïa ki jaitbynriew Naga bad Manipur. Kito ki samla pule Naga bad Manipur, ki wan pule shane bad ki pyntbit ïalade. Ynda ki la dep pule bad pyn-tbit ïalade ha kane ka Jylla ne ha kano kano ka Jylla ha ri India, ki leit phai sha Jylla la jong ban shimti ïa ki kam bapher bapher. Kumjuh kumba long ha Assam ha kaba tang ki Assamese ki bat ïa ki kyrdan baheh baheh.
To ngin ïa pyrkhat ïa kane ka bynta, kumno bad lano ngin ïoh ïa ki briew la jong, ki ban long kiba tbit ha ki kam ban long ki nongsynshar/nongpynïaid ïa ka Jylla la jong, kiba dei kiba smat basting, baïatylli bad bashemphang na ka bynta ka jingroi jong ka Jylla, kumba long lem kiwei pat ki Jylla ha ri India.
