Berlin, Naiwieng:
Ka Germany ha ka Sngi Nyngkong ka la pynbna ba kan phah ia ki 4,000 tylli ki drone AI sha ka Ukraine, hadien ba u Chancellor Olaf Scholz u la pynbna ia ka rai ba kin nym phah shuh ia ki ‘namding ‘Long-Range’ sha ka Ukraine.
U Scholz u dap da ka jingsngewkhia ruh ha kajuh ka por halor katei ka jingphah ia ki tiar ïakhun thma sha ka Ukraine, hadien ba u President ka United States- u Joe Biden, u la shah ia ka Ukraine ba kan pyndonkam ia ki ‘namding ba khlaiñ bor jong ka US ba kan ioh ban ïakhun pyrshah ia ka Russia.
Namar ka Ukraine ka la ju kyrpad na ka por- sha ka por ia ka Germany ba kan phah da ki ‘namding ‘Taurus’ ba khlaiñ bor jong ka Germany khnang ba ka Ukraine kan ioh ban ïakhun bad pyni bor markylliang ia ka Russia namar kine ki ‘namding jong ka Germany ki dei kiba lah ban poi haduh 500 Kilometre ka jing jngai.
Kumta, utei u nong-ialam u la ong ba, kumba u la ju pynshai man ka por ba ka Germany kam sngew dei ban phah ia utei u jait ‘namding sha ka Ukraine ioh kan long pynban ka jingleh pyrshah ia ki kyndon aiñ jong ka pyrthei bad ka Germany kam kwah ban nang pynheh shuh-shuh ia ka thma jong ka Russia. Namarkata, ka Germany ka la rai ban phah tang ia kitei ki drone kiba ka Ukraine kan ioh ban pyndonkam hapdeng ka jingiakhun bad jingiada jongka ia la u jong u pud- u sam na ka kti jong ka Russia.
Namar u Scholz u la ong ruh ba, hooid ka long kaba donkam shisha ban ai jingkyrshan ia ka Ukraine ba kan lah ban ïada ia lade na ki jingpynjot bad jingthombor jong ka Russia. Hynrei, watla katta ruh ka long kaba ma ban shu ai jingkyrshan khlem da pyrkhat sani pat ia kaei ka ban jia hadien lada baroh ki ri kin ai jingkyrshan ia ka Ukraine ba kan leit pynjot kylla pat ia ka Russia.
Namar la ong ba ka Germany ka long ka ri kaba 2 hadien jong ka United States, kaba la lah bha ban ai ka jingkyrshan kaba ratbah sha ka Ukraine naduh ba sdang jong ka thma.
