Agartala, Naiwieng:
Ki pulit ka tnat Government Railway (GRP) bad ki shipai ka tnat Border Security Force (BSF) ki la ïoh ban kem ïa 12 ngut ki nong Bangladesh ha Teliamura kaba hap hapoh ka Khowai distrik ha ka step jong ka Sngi Thohdieng.
Kane ka la jia ha ka por 7 baje mynstep, namar kine ki briew baroh kiba dei ki nongshong shnong jong ka North Jaliapara, Cox’s Bazar kaba don ha Bangladesh ki la pyrshang ban rung tuh shapoh ka jylla lyngba ki jaka khappud bapher-bapher.
Wat hapdeng ka jingpahara kaba pyrkhing bha ha khappud, kine ki jing-rung be-aiñ ki dang ïai bteng ban jia.
Ki pulit ki la ïoh jingtip ba ka kynhun ki trai ri Bangladesh, ryngkat ka jingïarap jong ki ‘riew pynkheiñ aiñ, kin rung lyngba ki thaiñ khappud Karbuk ne Shilachari kiba don ha Gomti distrik.
Ki la thmu ban poi sha ka jaka sangeh rel ha Teliamura, ban thied tiket rel, bad ban leit sha Assam da ka rel demo. Hynrei ka jingthmu jong ki ka la shah pynthut noh namar ka jingpyntreikam jong ki GRP bad ki BSF.
Ki briew kiba la shah kem ki kynthup ïa u Mohammad Siddique (60 snem), Monora Begum (50 snem), Abdul Aziz Ullah (22 snem), Azizul Haque (25 snem), Obaidul Ullah (19 snem), Jamila Khatun (5 snem), Khunshun (18 snem), u Kohinur Akhter (22 snem), Sagarika Yasmin (20), Satarai Yasmin (6 bnai), Nuru Siddique (5), bad ka Mohanti Ka Yasmin (2).
Ha ka jingtohkit ba nyngkong, katei ka kynhun ka la pynpaw ïa ka jingthmu jong ki ban leit sha Hyderabad.
Ïa kine ki briew kiba la shah kem la rah hakhmat ka ïingbishar na ka bynta ban set bad tohkit da ki pulit.
Ka jingtohkit kaba kham bniah ka dang ïaid ban lap ïa ka daw ba pura jong ka jingwan rung tuh bad ban kem ïa kiwei pat ki briew kiba donkti.
Ki bor ba dei peit ki dang pynjur ïa ka jingpyntreikam ban tehlakam ïa ki jingrung beaiñ bad ban pynthikna ïa ka jingshngaiñ bad jingïada ha ka ka jylla.
Ka jingpyntreikam ha ka ban khmih bniah ha ki bynta khappud ka dang ïai bteng haduh mynta khnang ban khanglad ïa ka jingrung beaiñ.
