Lucknow, Naiwieng:
Ki la don kumba 25 ngut ki briew kiba la shah kem bad 7 tylli ki mukotduma la mudui pyrshah ïa 400 ngut ki briew hadien ba 4 ngut ki briew ki la ïap ha ka jingïakhih halor ka jingjurip ïa kawei ka Mosque ne ka jaka mane blei jong ki riewngeit Muslim ha Sambhal jong ka Uttar Pradesh ha ka Sngi U Blei.
U MP jong ka Samajwadi Party na Sambhal, u Ziaur Rahman Barq, bad u khun jong u Iqbal Mahmood, u paralok jong u, u Nawab Suhail Iqbal, ki dei napdeng kiba la shah pynngat ha ki kyndon aiñ, ong ki heh sorkar.
Ka Sambhal ka la sakhi ïa ki jingïakynad ba shyrkhei hapdeng ki nongshong shnong bad ki pulit ha ka por ba ka ïingbishar ka la hukum ban jurip ïa ka Shahi Jama Masjid ha ka por jong ki Mughal ha ka step Sngi U Blei. Kane ka Mosque ka don ha pdeng jong ka jingïakynad ha ka liang ka aiñ halor ki jingkynnoh ba la tei ïa ka ha ka jaka jong ka jaka mane blei ki Hindu.
Ki nongïakhih ki la thang ruh ïa ki katto-katne ki kali bad kawang maw ruh ïa ki pulit, kiba la pyndonkam da ki lyer pynsat khmat bad ki lathi ban pynsapra ïa ki paidbah.
Kumba 20 ngut ki pulit ruh ki la mynsaw bad uwei u pulit, uba la mynsaw na ka khlieh, la ong ba u don ha ka jingshitom kaba kham jur.”Namar ka jingkren jong u Barq kham mynshwa, ka jinglong jingman ka la nang kham sniew hangne,” la ong u Superintendent of Police, u Krishan Kumar, ha ka jingïalang bad ki nongthoh khubor. U la ong ba ki dang ithuh ïa ki nongïakhih da kaba pyndonkam ïa ki dur ba la shim da ki Drone bad ba ïa kiba shah kynnoh yn pynngat hapoh ka aiñ National Security Act (NSA).
