Imphal, Naiwieng:
Wat hadien ba la pyndep ïa ka jingtohkit ïa baroh ki met ïap jong ki 6 ngut kiba la jah rngai na Jiribam jong ka Manipur, hynrei ki metïap ki dang sah ha jaka buh met ïap jong katei ka Hospital.
Wat hadien ba la pyndep ïa ka Post-mortem ïa baroh ki metïap jong ki 6 ngut kiba jah na ka Elaka Jiribam jong ka Manipur, hynrei kitei ki metïap ki dang sah ha jaka buh metïap jong ka Silchar Medical College and Hospital (SMCH) ha Assam namar ba kiba haïing kim nud satia ban rah biang ïa ki na ka bynta ka jinglehniam bakhatduh, la ïathuh ki tyllong khubor ha ka sngi Palei.
Ïa ka met kaba khatduh la lap ba ka dang per ha ka wah Barak ha ka Elaka Cachar jong ka Assam ha ka lah sngi u Blei, hadien kata la pynlong ïa ka jingtohkit ïa ka met ïap jong ka ha SMCH.
“Ka jingkhmih bniah ïa baroh 6 tylli ki met ïap la leh ha SMCH. Ki doktor kiba ïadei kam ki la pynkhreh ruh ïa ki kaiphot,” la ong ka tyllong khubor hadien ka jingwad bniah halor ka jingjia ha ki nongthoh khubor.
Hynrei une u heh sorkar u la ong ba ym pat don kano kano ka jingpynthikna lano yn rah ïa ka met ïap sha Manipur na ka bynta ban aiti sha ki longïing jong ki ban leh ïa ka jingleh niam kaba khatduh.
“Ngim tip thikna ïa kaei kaba jia. La ïathuh ïa ngi ba ki longïing kim pat long kiba la pynkhreh ban pdiang ïa ki met ïap haba peit ïa ka jinglong jingman kaba mynta ha Jiribam. Ki pulit ka Manipur ki dang pyrshang ban pynsngewthuh ïa ki ba kin pdiang ïa ki met ïap bad ban leh ïa ka jingleh burom kaba khatduh.” la ong ka tyllong khubor.
Katkum ka tyllong khubor, la ong ba ki pulit ka Assam kiba ap pahara ïa katei ka Hospital bad ïa ki metiap ha ka jaka buh metïap, ki la kyrpad ïa ki paralok jong ki na Manipur ba kin shim kloi katba lah ïa ki metiap.
Ïa ki met ïap jong kitei ki 6 ngut, kiba la jah rngai na Jiribam hadien ka jingïasiat hapdeng ki bor pahara bad kiba la suba ba ki dei ki lehnoh Kuki-Zo kaba la pynlong ïa ka jingïap jong ki 10 ngut ki lehnoh ha ka 11tarik, Naiwieng bad la lap ïa kitei ki met ïap ha ka wah Jiri ha Jiribam bad ha wah Barak ha Cachar jong ka Assam haki khyndiat sngi ba la leit.
La wanrah ïa ki sha SMCH ha ka “jinglong kaba la sniew bha” ban leh ïa ka jingpeit bniah ïa ka met jong ki.
Ha kaba nyngkong, la lap ïa ka met jong kawei ka longkmie bad arngut ki khynnah kiba ngam ha ka wah Jiri ha Jiribam bad la wanrah sha SMCH ha ka 15 tarik, Naiwieng.
Sa ar tylli ki met ïap jong kawei ka longkmie bad uwei u khynnah la lap ha ka wah Barak ha ka 17 tarik, Naiwieng ha Cachar distrik.
Kitei ki 6 ngut kiba kynthup ïa lai ngut ki kynthei bad ki khynnah marwei marwei na ka jaitbynriew Meitei, ki la jah rngai na kawei ka jaka sah ba shipor kaba don ha ka thain Borobekra jong ka Jiribam bad la kynnoh ba ki la shah rahbor ha ki lehnoh Kuki-Zo.
Kitei ki 6 ngut kiba la jah rngai ki dei kiba la tip kyrteng kum ka Yumrembam Rani Devi (60 snem), ka Telem Thoibi Devi (31 snem) bad ka khun jong ka ka Telem Thajamanbi Devi (8 snem), ka Laishram Heithoibi Devi (25) bad ki arngut ki khun jong ka, u Laishram Chingkheinganba Singh (ar snem shiteng) bad u Laishram Lamnganba Singh (10 bnai).
Hadien ka jingjur jong ki kam thombor ha kine ki taïew ba la dep ha Jiribam, kaba don ha khappud bad ka distrik Cachar jong ka Assam, la pynbna ïa ka jingmaham ha katei ka distrik da kaba sdang ïa ka jingpahara baroh shisngi ha ki jaka khappud ba jngai.
La pynjari ruh ïa ki kynhun shipai ba kyrpang jong ki Commando. Ka Jiribam kaba don ki jaitbynriew bapher bapher, kaba la kham bunsien kam shym la shah ktah ha ki jingïakynad ha ka them Imphal bad ki lum ba marjan, ka la sakhi ïa ka jingïakynad hadien ba la lap ïa ka met jong uwei u nongrep ba la shah ot ha kawei ka lyngkha ha u bnai Jylliew jong une u snem.
Palat 220 ngut ki briew ki la ïap bad da ki hajar ngut ki la sah khlem ïing khlem sem ha ka jingïakynad hapdeng ki Meiteis kiba shong ha Imphal Valley bad ki kynhun Kuki-Zo kiba shong ha ki lum ba marjan naduh u bnai Jymmang jong u snem ba la dep.
Ka la sdang hadien ba la pynlong ïa ka ‘Tribal Solidarity March’ ha ki thaiñ lum ban pyrshah ïa ka jingdawa jong ki jaitbynriew Meitei ban ïoh ïa ka kyrdan Scheduled Tribe (ST).
Ki Meitei ki don kumba 53 na ka shispah na ka jingbun briew jong ka Manipur bad ki shong kham bunsien ha ka them Imphal.
Ki riewlum — ki Naga bad ki Kuki — ki don tang khyndiat palat ïa ka 40 percent bad ki shong ki sah ha ki jaka lum.
