Kohima, Risaw:
Ka sorkar Nagaland ha ka 14 tarik u Risaw ka la sdang ïa ka skhim General Household (GHH) ban ai Subsidy ïa u khaw sha ki longïing kiba dei hok kiba don shabar jong ka National Food Security Act (NFSA), 2013, ha kaba la ithuh haduh 1,21,238 ngut ki nongïoh myntoi ha ka bynta kaba nyngkong.
Ïa kane ka skhim la plie paidbah ha Dimapur da u Advisor for Food and Civil Supplies u K T Sukhalu, uba la ong ba kane ka skhim ka long ban weng ïa ka jingduna ha ka bhah marbam hadien ba la pyntreikam ïa ka NFSA bad ban pynïar ïa ka jingkyrshan ïa ka jingpynbiang bam sha ki long ïing kiba dei hok ki bym shah ktah ha ka Public Distribution System (PDS).
U Sukhalu u la ong ba la khmih lynti ba ka jingdon jong ki nongïoh myntoi kan nang kiew katba nang ïaid ka jingpyntreikam. Kane ka skhim ka plie ïa ki nongshong shnong jong ka ri Indua kiba dei hok, kynthup ïa ki trai ri trai muluk bad ki bym dei ki trai ri trai muluk kiba ïahap bad ki kyndon ba la buh.
Haba pynshai ïa ka rukom ai pisa jong ka sorkar pdeng ïa ka Tide Over Rice, u Sukhalu u la ong ba ka la don naduh u snem 2017 ban pyndap ïa ki jingdonkam khaw ba kham bun.
Hapoh katei ka jingpynbeit, ki Stockist ba la thung da ka sorkar jylla ki sei ïa ki marbam na ka Food Corporation of India (FCI) ha ka jinglut jong ki hi, katkum ki kyndon jong ka sorkar.
U la ong ba ka tnad ka ju ïoh jingkyrpad ïa u khaw ha ki por tamasa, jubili bad kiwei kiwei ki jingrakhe, kumjuh na ki ïing jong ki tymmen, ki briew kiba duk bad ki sengbhalang. La pynjlan ruh ia ka jingïarap ha ki katto katne ki khep, kynthup ïa ki jingjia pluh ding, katkum ka jingkyrpad na ki bor synshar distrik bad ka jingmynjur na ka bor ba dei peit.
U Sukhalu u la pynshai ba ki jingai Tide Over kim dei ka jingsam khlem jingsiew, da kaba bynrap ba ïa ki jingbam ba la pynbiang na ka bynta ki jingïarap la thied lyngba ki tnad ba dei peit, kynthup ïa ki bor pynïaid ïa ki jingjia ba sngewsih, ha kano kano ka jaka ba donkam.
U la ong ba ka tnad ka la shim ïa ki lad pynkhreh ban pynbeit ïa ka jingsam, ban weng ïa ka jingkulmar ha kaba ïadei bad ka jingai pisa bad ban pynbha ïa ka jingnang pynshai.
U Secretary ka tnad sam marbam u Wonchio Odyuo u la ong ba ïa kane ka skhim GHH la pyntreikam katkum ki kyndon jong ka sorkar jylla kiba pynïaid ïa ki jingai Tide Over hapoh ka NFSA.
