Imphal, Naiwieng:
Ki kaiphot jong ka jingkhmih bniah ïa ka met jong san ngut ki lanot kiba la shah thombor ha ka por ba don ka jingshah thombor ha Jiribam ki la pynbna ba ka long kaei-kaei kaba sngew shyrkhei bad sngewsih ban tip shaphang ki jingshah pynmynsaw jong ki, ki jingmynsaw ba bun na ki jingdei kuli bad ka jingshah pynmynsaw kaba jur bha kaba la ktah ïa ki jingmut jingpyrkhat jong ki. Napdeng ki hynriew ngut kiba la shah rahbor bad kiba la shah pynïap, u Laishram Lamnganba, u khyllung ba dang 10 bnai, u la shah pynmynsaw na ka jingdei kuli ha ka khohsiew kadiang jong u bad la lap ba baroh ar tylli ki pyllew khmat ki la jah.
Ka jingpeit bniah ïa ka met jong u khyllung ka la batai bniah ruh ïa ki jingmynsaw ba bun bad ki jingmynsaw na ki tiar ba luiñ, kynthup ki jingpait jong ka shynrong khlieh bad ka jingkheiñ ka tyrpeng kadiang. Ka kmienah jong u Lamnganba, ka Telem Thoibi (31), ka la mynsaw na ka jingdei lai tylli ki kuli ha ka shadem bad uwei ha ki bynta jong ka kpoh. Ka shynrong khlieh ruh ka la pait namar ka jingshah pynmynsaw da ki tiar kiba khia bad kiba luiñ, ha kaba kane ka la pynlong ïa ka shynrong jong ka ba kan jur ha ka jingpra bad pait bad pynpra ïa ka jabieng. Baroh ar tylli ki kti ba shakhmat jong ka ki la shah pynkheiñ bad ki khmat jong ka ki la shah khlaw. Ka khun jong ka Thoibi kaba dang 8 snem ka rta, ka Telem Thajamanbi Devi, ruh ka la khlad noh na ka jingjur ki jingmynsaw na ka jingdei kuli. Lah ban kdew hangne ba ka kaiphot halor ki lai ngut napdeng ki hynriew ngut kiba shah rahbor ha Jiribam bad kiba la shah pynïap ha ki lehnoh Hmar Kuki-Zo la dep ban pyllait da ka Silcahr Medical College and Hospital (SMCH) ha Assam.
Ki kaiphot jong ka jingkhmih bniah ïa ka metïap ki kynthup ruh ïa ki jingtip ba bniah shaphang arngut ki briew kiba la shah pynïap ha ka jingshah thombor ha ka 11 tarik, Naiwieng da ki suba lehnoh Kuki. U Maibam Kesho Meitei (72 snem ka rta) u la mynsaw jur ha ka jingshah thang, bad ki dkhot met ki la jah, katba ka Laishram Baren Meitei (64) ruh ba ka la ingkhong na ka jingshah thang bashyrkhei. Kane ka jinghiar thma ka la jia ha ka thaiñ ba hap hapoh ka jingkhmih jong ki pulit ka Borobekra ha Jiribam, kaba dei ka jaka sah ba shipor jong ki briew ki bym don jaka sah. Ki lehnoh ki la pynïap ïa arngut ki riew paidbah bad ki la ïasiat markylliang bad ka kynhun jong ki CRPF, kiba la pynphai kylla ïa ka jingsiat bad ïoh ban pynliem ïa ki 11 ngut ki nongthombor.
Ïa ki met ïap jong kine 6ngut, kynthup ïa 3 ngut ki khynnah, kumba la ïathuh ba ki la shah rahbor ha ki lehnoh Kuki-Zo-Hmar, la lap ba ki la per bad tuid ha ka wah Barak. Hadien kane ka jingjia, ki la mih biang ki jingïakhih bad ki jingïakynad ha kaba la dawa ba la dei ban pynïoh ïa ka jingbishar bahok na ka bynta kine ki lanot kiba la shah pynïap. Kum shi bynta ban tehlakam bad ban khanglad ïa ki jingïakhih bad ki jingïakynad, ki bor sorkar ki la pynsangeh treikam noh ïa ka Internet khnang ban lah pynneh ïa ka shongsuk-shongsaiñ. Ha ka jingjia kaba dang shen, ki bor pynïaid ki la buh da ka jingujor mukotduma ha ka kynhun NIA bad pynlong ïa ka jingtohkit kaba thymmai halor kane ka jingjia ha Jiribam. Kumba ka long mynta, ki paidbah ki dang bteng ban dawa na ka bynta ka jingshim ïa ka jingkitkhlieh bad ban pynïoh ïa ka jingbishar bahok na ka bynta kine kiba la shah pynïap. Kane ka jingjia ba sngewsih ka wanrah sa kawei pat ka bynta kaba ktah ïa kiba bun kum ha kane ka por ba dang bteng ki jingïakynad ha Manipur, ha kaba kane, ka la pynksan ïa ka jingdonkam ba kyrkieh ban wanrah ïa ka jingsuk bad jingpynïasuk ha ka thaiñ.
