Itanagar, Nohprah:
U Myntri Rangbah ka Arunachal Pradesh, u Pema Khandu u la pynthikna ba ha kine ki lai snem ban sa wan jong ki snem ka kheiñ ka diah, ka jylla kan ïoh ïa ka jingkylla kaba khraw ha ka pule puthi ka ban pynthikna ïa ka jingïoh ïa ka jingpule kaba bha, ki jingtei kiba kham bha, bad ki lad kiba kham shai sha ki samla jong ka jylla.
Haba kren ha ka jingïalang paidbah ha Logum Jini, hajan Aalo ha West Siang distrik ha ka lah sngi U Blei, u Khandu u la ong ba ki jingïalang pyrkhat kam lane ki ‘Chintan Shivirs’ ki dang pynlong ha kylleng ka jylla ba la khlieh da u Myntri ka tnat pule puthi u P D Sona lem bad u nong-ai-buit u Mutchu Mithi ban sngewthuh bad buh jingthoh ïa ki mat ba kongsan ha ka tnat bad ki lad ki lynti bad ki jingthmu ban weng ïa ki jingeh jong ki.
U la ong ba ynda la dep kine ki jingïalang, yn sa aiti ïa ka kaiphot kaba bniah ryngkat bad ki jingai jingmut sha ka sorkar jylla ban leh ïa kaba donkam, la ong ka kyrwoh ba thikna na ka ophis jong u Myntri Rangbah ka jylla hangne ha ka sngi Ba-ar.
“Nga kular ba ki jingpynkylla ba la ai jingmut kin pyntreikam 100% ha ka jaka,” la pynthikna u Khandu.
Da kaba jied ïa ka jingbha ban ïa ka jingbun, u Khandu u la ong ba ka jingbun ki skul kam pher hynrei ka jingbha jong ka jingpule ka pher.
Ha ka jingshisha, u la kdew, ka jingbun bah ki skul sorkar ha ka jylla ka la pynsniew ïa ka jinglong jingman jong ka jingpule.
U la ong, “Phin sngew lyngngoh ba ha kine ki 9 snem ngi la khang palat 600 tylli ki skul. Yn sa khang shuh shuh ha ki sngi ban wan.”
Ka sorkar, u la ong, kan pynleit jingmut ha ki skul hapdeng ki shnong da kaba pyndap ïa ki da ki jingdonkam baroh kum ki Hostel, ki nonghikai bad ki nongtrei bad ki rukom hikai kiba mynta. Ban pyntreikam hok ïa ki jingpynkylla, katto katne na ki, u la kam ba ki lah ban long kiba eh ne ki bym biang, u Khandu u la pan jingkyrshan bad jingïatreilang na ki paidbah.
Haba kdew ïa ka jingkiew jong ka jinglum khajna ha ka pla tyngka jong ka jylla, u Myntri Rangbah u la pynpaw biang ba ka jingpynmih khajna jong ka jylla ka la buh ban kiew bha ha ki snem ban wan.
U la pynsngew ba ka bording ka la long kum kawei na ki lad pynmih khajna kaba treikam bha namar tang ka Arunachal Pradesh ka bat 50% na ka bor pynmih bording baroh jong ka ri India.
U Khandu u la pyntip ba ka sorkar pdeng ka la mynjur ban ïasam da 26% na man kawei pa kawei ka projek sa ka jylla nalor kaba la don lypa da 12% ka bording ba la sam ei.
U la ong ba lada ïa ka 35,000-mw ba la tyrwa la pynlong pisa katkum ka jingmih kaba ka jylla ka ïoh ha kine ki 10 snem ban wan, kan long kaba phylla haduh 10000 klur tyngka ha ka shisnem.
“Katba ngi nang pynmih khajna, katta ngi nang lah ban kyntiew ïa ka jinglong jingman jong ki briew jong ngi”, u la ong shuh shuh.
