Visakhapatnam:
Ha ka jingbteng ban pyntreikam pyrkhing halor ka jingkhaïi beaiñ ïa u khaw Public Distribution System (PDS) la ïoh ban kurup ïa u khaw haduh 483 Metric Ton ha ka jaka thep mar kaba don hajan ka Vizag Port.
Kane ka la jia ha ka jingleit jurip ba kynsan jong u Myntri ka tnad Civil Supply u Nadendla Manohar ha kine ki khyndiat sngi ba la leit.
Hadien ka jingkynnoh ba ka Vizag ka la kylla long ka khyrdop jong ka jingshalan tuh ïa u khaw PDS, u la pynlong ïa ka jingkhynra ba kyndit ha katei ka kad, bad ki kynhun ba kyrpang ki la lap ïa kawei ka jaka buh mar kaba don da u khaw PDS uba don 483 metric ton uba la khreh ban shalan shabar ha katei ka jaka kit mar.
Hadien haba kren sha ki lad pathai khubor, u Myntri u la ong, “Namar ba la nang pynjur ïa ka jingpahara ha ka Kakinada Port, ngi la ïoh jingtip ba palat 70,000 Metric Ton u khaw PDS la shalan beaiñ ha kine ki ar bnai ba la leit na Vizag Port namar ba ki nongshalan tuh ki la kylla jaka sah. Da kaba kynnoh ba ka jingkhaïi tuh jong u khaw ka PDS ka la jur bha ha ka por jong ka sorkar YSRCP, u la ong ba palat 1.38 klur metrik ton u khaw la shalan beaiñ na Kakinada Port, bad 36,000 metrik ton na Vizag Port bad u khaw uba shongdor T.12,000 klur la shalan beaiñ ha ki lai snem ba la lah. La pyntip ïa u Joint Collector jong ka Visakhapatnam ha kaba ïadei bad kane, bad ki jingkhynra kin pynlong tang da kaba pynshong nongrim ïa ki jingtip ba la pynshisha,” la ong u Manohar.
U khaw PDS uba la mut ban pynbiang sha ki 1.48 klur ngut ki nongïoh jingmyntoi la pynkylla lynti bad shalan shabar ri, kaba la pynsniew ïa ka dur jong ka AP. Baroh ar tylli ki sorkar Jylla bad sorkar pdeng kin pynjur ïa ka jingpahara bad ban khanglad ïa ka jingkhaïi tuh ïa u khaw PDS, u la ong.
