
Guwahati, Nohprah:
Ka Sorkar Assam, hapoh ka jingbthah jong u Myntri Rangbah ka jylla u Himanta Biswa Sarma ka la pynlong ïa ka Hybrid Meeting kaba thmu ban bishar bniah bad ban thaw ki buit ha kaba ïadei bad ki lad jingïada ha ki surok.
La pynlong ruh ïa ka jingïalap Mission-Mode kaba 45 sngi ban pynthikna ïa ka jingpyntreikam kaba biang. Ïa kane ka jingïalang la khot da u Chief Secretary jong ka Assam u Ravi Kota ha ka jingïadonlang u Director General of Police (DGP) u G.P. Singh, ki Deputy Commissioner (DC), ki Superintendent of Police (SP), bad ki Ophisar jong ki District Transport Officer (DTO) jong ka jylla, da kaba pynleit jingmut ha kaba ïadei bad ka jingkiew jong ki jingjia aksiden ha surok namar ka jingjur jong ka por leit bam khana sngewbha jong ki briew.
Kum shi bynta jong kane ka jingthmu, yn sdang ïa ka jingïalap paidbah kaba 45 sngi ha Mission-Mode naduh ka 15 tarik u Nohprah, 2024 haduh ka 31 tarik, Kyllalyngkot, 2025.
Ka jingpyrkhat kan long halor ka jingpyntreikam ïa ki lad ki lynti kiba la buh thong ban ïada na ki jingjia aksiden ha surok, da kaba pyrkhat kyrpang ïa ki jaka kiba lah ban shah ktah ha ki surok ba ju kham jia kum kine ki jingjia basngewsih.