New Delhi, Nohprah:
Ka Delhi High Court ha ka sngi Balang ka la pynmih ha ka 17 tarik, Kyllalyngkot, 2025, ïa ka jingujor jong ka Enforcement Directorate ban pyrshah halor ka jamin ba la ai ïa u Arvind Kejriwal, Myntri Rangbah barim jong ka jylla, ha ka mukotduma jong ka jingkamai ïa ka spah bym hok halor ka jingpyntreikam jong u snem 2021-22.
U nongïasaid aiñ jong ka ED u la kyntu ïa u Justice Manoj Kumar Ohri ban pynsangeh noh ïa ka jingbishar halor kane ka kam namar ka jingbym don jong u Additional Solicitor General u S V Raju.
Ïa kane ka jingkyrpad la pyrshah da u nongïasaid aiñ rangbah, u Vikram Chaudhary, uba mihkhmat ïa u nongïalam ka AAP, da kaba kdew ïa ka jingdonkam kyrkieh ha kane ka kam.
“Phim lah ban don ka waitlam kaba la wah ha ka khlieh jong nga,” u la ong. Hynrei u nongïasaid aiñ jong ka ED u la ong ba u Kejriwal u la don lypa ha ka jamin katkum ka hukum ba la pynmih da ka Supreme Court.
Ha ka 12 tarik, Naiwieng, ka ïingbishar ba ha khlieh duh ka la ai jamin shipor ïa u Kejriwal ha ka mukotduma jong ka jingkamai ïa ka spah bymhok katba ka dang kdew sha ka kynhun nongbishar kaba kham heh ba la buh ïa lai tylli ki jingkylli halor ka liang jong ka “jingdonkam bad jinghap ban kem” katkum ka aiñ Prevention of Money Laundering Act (PMLA).
Ha ka 20 tarik, Jylliew, u Kejriwal u la ïoh jamin ba la ai da ka ïingbishar halor ka jingïakut kaba T.1 lak, ïa kaba hadien la pynsangeh noh da ka ïingbishar ba ha khlieh duh.
Kum ban shu kdew, u Kejriwal u la shah kem ha ka kynhun ED bad ha ka kynhun CBI ha ka 21 tarik, Lber bad ka 26 tarik, Jylliew, ha ki jingjia jong ka jingkamai ïa ka spah bymhok bad klop tyngka.
