Bhubaneswar, Naitung:
Ka sorkar Odisha, ka la mynjur ïa ka jingtyrwa kaba T.125 klur tyngka ka Ama Similipal Yojana, kaba dei ka jingthmu kaba kongsan bha ban ïoh kamai bad kaba wad ban thaw ïa ki lad kamai kiba neh na ka bynta ki trai shnong kiba sah sawdong jong ka Similipal Tiger Reserve (STR).
Ïa ka pisa na ka bynta kane ka projek kaba heh la dep ban buh ha ki bor pynïaid jong ka jaka ri mrad.
U Regional chief conservator of forests (RCCF)-cum field director jong ka STR u Prakash Chand Gogineni u la ïathuh ha ka lad phah khubor ha ka lah sngi u Blei ba ka sorkar ka la pynkhuid ïa kane ka jingtyrwa ha ki khyndiat sngi mynshwa bad ka la mynjur ïa ka pisa na ka bynta ban pyntreikam ïa ka.
Ïa kane ka projek yn sdang shwa u bnai Risaw hadien ba la dep ban plie paidbah ïa ka.
Ki heh sorkar ki dang pyndep mynta ïa ka buit pyntreikam katkum ka Detailed Project Report (DPR). Ïa kane ka DPR la aiti sha ka sorkar jylla la jan hynñiew bnai mynshwa.
Ka skhim kan ktah ïa kumba 200 tylli ki shnong kiba don ha trai lum jong ka STR, ha kaba ki nongshong shnong ba marjan ki shim ïa ka kam ri mrad bad kam ri mrad beaiñ khlem ka kam kaba kamai.
U Gogineni u la ong ba kane ka skhim ka long katkum ka jingmut jong ka ‘Jiban Jibika’ (ka jingpynroi jingim) bad ka wad ban ai ki lad kamai kiba lah ban neh sha ki jaidbynriew kiba shaniah ha ki khlaw ki btap.
“Ka jingim kaba skhem kan pynduna ïa ka jingshaniah jong ki nongshong shnong kiba sah ha rud jong ka jaka ri mrad ha ki marpoh khyndew bad kan pynduh mynsiem ïa ki ban leh ïa ki kam ri mrad, kaba ym tang ba ka buh jingma ïa ki mrad khlaw hynrei ka pynlong ruh ïa ki ban shah pynngat ha ki kam runar bad shah set phatok,” u la ong.
Hapoh kane ka skhim, yn ai jingïarap pisa bad jingstad nyngkong eh lyngba ki kynhun Self-help Group (SHG) na ka bynta ki kam bapher bapher kiba lah ban pynmih ïa ka ïoh ka kot.
Kine ki kynthup ïa ka jingshna ïa ki pliang sla sal, ka jingshna jaiñ, ka jingpynkhreh ïa ka umngap, ka jingpynkhreh ïa ka dud, ka jingri syiar, ka jingri blang bad langbrot, ka rep bad ka jingthung ïa ki jingthung bym dei da u kba uba thung ha ka por ba lyngkot.
Ïa ka jingpyntreikam ïa ka skhim yn buddien lang da ki bor pynïaid jong ka jaka ri mrad bad Eco Development Committees (EDC) ban pynthikna ïa ka jingïashim bynta jong ki paidbah, ka jingshai bad ka jingpyntreikam kaba paka. La dep thaw haduh 25 tylli ki EDC na ka bynta kane ka jingthmu.
Katba ki bor pynïaid jong ka STR ki thmu ban pynkhlain ïa ka jingpeitngor hapoh katei ka jaka ri mrad da kaba buh sa 500 tylli ki camera kiba pyndonkam da ka jingstad thymmai ban pynskhem ïa ki lad jingïada na ka jingtuh ïa ki mrad.
U Gogineni u la ong ba kumba 200 tylli ki camera kiba pyndonkam da ka AI ki la dep treikam ha katei ka jaka ri jingri ha kine ki khyndiat snem ba la dep. Ki camera thymmai, kiba la thied ha ka dor kaba T.2.25 klur, kin pynïar ïa ka jingpeitngor ha ka por ba shisha shaduh haduh 50 percent jong ka jaka ri mrad.
La khmih lynti ba ka kam buh kan sdang noh shen ynda ka jinglong ka suiñbneng ka la long kaba bha, u la bynrap.
