Vijayawada, Naitung:
Ka sorkar jylla kan pynïar shuh shuh ïa ka jingthmu jong ka ‘Smart Kitchen’ hapoh ka skhim Dokka Seethamma Mid-Day Meal ha Kadapa distrik, kaba thmu ban ai ïa ki jingbam ba khluit, ba tei met sha palat shi lak ngut ki khynnah skul ha ki skul sorkar bad ki kolej rit.
La buh 33 tylli ki kamra bam bathymmai ha ka jinglut kaba T.29.70 klur, nalor san tylli kiba la dep treikam.
Ynda la dep pyndep, 38 tylli ki centre kin pyndap ïa 1,00,091 ngut ki samla pule ha kylleng ki 1,778 tylli ki jaka pule.
Ki heh sorkar ki la ïathuh ba ki jaka shet jingshet kiba thymmai la khmih lynti ba kin treikam ha ka taïew kaba ar jong u bnai Nailar.
Kawei pa kawei ka kamra shet jingshet, kaba shongdor T.90 lak, ka kynthup ïa ki tiar shet jingshet kiba mynta, ki RO water plant, ki biodigesters, ki solar power system, ki kali kit marbam, ki CCTV camera bad ki GPS monitoring.
La pynrung ïa ki buit kiba thymmai kum ka jingshet jingbam da ka jynhaw bad ka jingpynïaid ïa ki jaboh jabaiñ katkum ka jingstad saïan ban pynthikna ïa ka jingkhuid jingsuba bad ka jingpynpoi ha ka por kaba biang.
Ka jingtei ïa ki 20 tylli ki kamra bam la dep, katba 13 tylli ki dang don ha ka kyrdan ba khatduh. Ki jingpyrshang ki dang ïaid ha ki katto katne ki jaka, da kaba pynbeit ïa ki jingeh kiba rit.
Ki bor synshar ki la ong ba kane ka projek kan pynbha ïa ka koit ka khiah jong ki samla pule, ka jingwan skul bad ka jingpule, katba kan thaw kam thaw jam ïa ki kynhun ïarap ïalade jong ki kynthei, ki ban shah hikai ban pynïaid ïa ka jingshet bad jingsam.
Ka sorkar ka la mynjur ïa ka bynta kaba lai jong ka jingpynheh, ha kaba la thmu ban shna shuh shuh ïa ki jaka shet jingshet ha Rajampet, Veeraballi, Nandalur, Sundupalle, Kadapa city bad Proddatur Urban.
La khmih lynti ba u Nara Lokesh, Myntri ka tnad pule puthi, un plie ïa kitei ki centre bathymmai ha u bnai Nailar.
