Pynjulor ki pulit ïa u syntiew Poppy ha 110 akar ka jaka ha Ukhrul

Ha kane ka jingkhynra, la thang ïa 8 tylli ki ïing trep ba la lap ha ki lyngkha.

Imphal, Nohprah:

Ki la don baroh 8 tylli ki ïing trep ba la lap ha ki bynta jong ki lum Khamasom ha Ukhrul, Manipur kiba la shah thang hadien ba la pynjot ïa ki kper ba rep ïa u syntierw Poppy, la ong u Myntri Rangbah ka jylla u N Biren Singh. U Myntri Rangbah ha ka jingthoh kaba u la phah sha ki lad pathai khubor u la ong, “Kane ka long kawei pat ka jingjop kaba khraw ha ka jingïakhun jong ngi pyrshah ïa ka jingrep syntiew Poppy be-aiñ.” 

Ka kynhun ba la pynïasohlang kaba kynthup ïa ki pulit jong ka Elaka Ukhrul, ka tnad khlaw, ki 18 Assam Rifles bad ka bor synshar distrik ki la pynlong ïa ka jingpynjot ïa syntiew Poppy kaba bun ha ki lum Khamasom kiba hap hapoh ka jingpeit jong ki pulit jong ka Ukhrul Police Station ha ka sngi Palei.

Ha ka jingïakhun pyrshah kaba dang ïai bteng halor ka jingthung poppy be-aiñ, ki nongïada aiñ jong ka ri ki la pynjot haduh kumba 110 akar ki jaka rep Opium be-aiñ ha ki bynta ba Shatei jong ka Manipur kiba ïasam khappud bad ka Myanmar. Ha kane ka jingkhynra, la thang ïa 8 tylli ki ïing trep ba la lap ha ki lyngkha.