ïakhih ki nongshong shnong ba pyntreikam ïa ki kynhun pahara ha AP

Ka kynhun jong ki pulit ka jylla kan don ha Yingkiong, bad ki pulit kynthei kin don ha Geku bad Jengging.

Itanagar, Nohprah:

Ki la don da ki spah ngut ki paidbah na ka thaiñ Siang bad Upper Siang jong ka Arunachal Pradesh ha ka Sngi U Blei ban pynlong ïa ka jingïakhih pyrshah ha khyrdop jong ka shnong Parong ha ka thaiñ Siang halor ka jingthmu ban buh ïa ki shipai ka tnat Central Armed Police Force (CAPF) na ka bynta ban pynlong ïa ka Pre-feasibility Report na ka bynta 11,000 mw Siang Upper Multipurpose Project. Ki nongïakhih ki la pyrta da ki kyntien kiba pyrshah ïa ka sorkar namar ka jingthmu jong ka ban pyntreikam ïa ka kynhun shipai, da kaba kdew ïa ki jingeh ha ka imlang-sahlang kum ka jingshah pynkynriah jaka, ka jingduh noh ïa ki jaka jong ki kpa tymmen, bad ka jingma ïa ki jingthaw ba im.

Ki la kynthoh ruh ïa ka sorkar ba ka la ïuhroit ïa ka hok jong ki paidbah bad ki la dawa ruh ban weng noh mardor ïa ki bor pahara bad ban pynsangeh noh ïa katei ka projek. Kitei ki nongïakhih ki dei kiba kham bun na ki shnong Parong, Riew, Geku, bad Sitang. Ka sorkar jylla ka la buh ïa ka 15 tarik, Nohprah kum ka sngi ban phah ïa ki bor pahara. Nalor ki shipai jong ka sorkar pdeng, ka sorkar jylla kan buh ruh ïa ka kynhun pulit jong ka jylla, kiba kynthup ïa ka kynhun pulit kynthei, na ka bynta ka PFR jong ka projek dam Siang ha ki jaka ba shah ktah.

Ha Upper Siang distrik, yn buh lai tylli ki kynhun jong ka CAPF ha Geku, ha Uggeng, bad ha Jengging. Ka kynhun jong ki pulit ka jylla kan don ha Yingkiong, bad ki pulit kynthei kin don ha Geku bad Jengging. Ha ka Siang distrik, yn pyntreikam haduh 5 tylli ki kynhun shipai, ba kynthup ïa ar tylli ki kynhun ha ka liang kadiang jong ka shnong Begging bad ar tylli ha ka phang kamon jong ka rud nong jong ka shnong Parong bad kawei ka kynhun kaba don ha ophis treikam jong ka NHPC ha Boleng. Ka kynhun jong ki pulit ka jylla yn buh ha Siang HQs, Boleng, na ka bynta ban pynïaid beit ïa ka aiñ bad ka suk ka saiñ kaba kyrkieh. Ki pulit kynthei kin sa shah pyntreikam ha ka ophis treikam jong ka NHPC, Boleng, bad ha ka shnong Parong. Ha East Siang distrik ka kynhun CAPF ka don ha E Coy na ka bynta ban ïada ïa ka ophis treikam jong ka NHPC ha Pasighat.