
Guwahati, Nohprah:
U Myntri Rangbah ka Jylla Assam, Himanta Biswa Sarma bad u Myntri Rangbah ka Odisha, Mohan Charan Majhi, ha ki khyndiat sngi ba la leit ki la plie ïa ka Badminton High-Performance Centre (HPC) kaba thymmai ha madan ïalehkai kaba pawnam jong ka Kalinga Stadium ha Bhubaneshwar. Ïa kane ka jaka la plie paidbah ha ka jingdon lang u Coach bahakhmat eh jong ka ri India u Pullela Gopichand.
U Myntri Rangbah ka Assam uba dei ruh u President jong ka Badminton Association of India u la ïaroh ïa ka jingïohi jngai bad ka jingpyrshang kaba don ha lyndet jong kane ka jingthmu. “Kane ka jingïatreilang hapdeng ka sorkar Odisha, ka Dalmia Bharat bad ka Pullela Gopichand Badminton Foundation ka pyni nuksa kumno ka jingïatreilang jong ki paidbah bad ki riew shimet ki lah ban batai shai ïa ki jingtei ïalehkai bad ban kyntiew ïa ki nongïalehkai,” u la bynrap.
“Ka jingthmu jong nga ka long ban don ki jaka ai jinghikai kiba tbit ha manla ki jylla ban pynthikna ba ki nongïalehkai ba dang khie jong ngi kin ïoh ïa ka jinghikai kaba bha tam,” u la ong.
Haba kren ha kane ka jingïalang, u Majhi u la ong ba kane ka jaka kan ai ïa ki jaka ai jinghikai bad ai jinghikai kiba ha ka kyrdan pyrthei hapoh ka jingpeit beit jong u Gopichand. U la pynpaw ba ka jingbuh ïa kane ka jaka ïalehkai Badminton kaba pawnam ha ka pyrthei ka dei ka jingkular jong ka sorkar Odisha ban pynroi ïa ki samla ïalehkai bad ban pynbiang ïa ki ïa ki lad ki lynti ban ïoh ïa ka jingjop ha ka pyrthei.
Ïa kane ka HPC, ka dei ka jingïatreilang hapdeng ka sorkar Odisha, ka Pullela Gopichand Badminton Foundation bad ka Dalmia Bharat Group, la tei ha ka dor kaba T.75 klur.U Gopichand u la ong ba kane ka jaka ryngkat ka jingshna kaba kyrpang bad ki jingdon jingem kiba thymmai kan don ka bynta kaba kongsan ban pynwandur ïa ka lawei jong ka jingïalehkai Badminton jong ka ri India.
La pyndap ïa ka da ki tiar kiba thymmai tam, ki ban pynleit jingmut ha ka jinghikai ba tbit bha, ka Sport Sciece bad ka jingwad ïa ki sap, ban pynroi ïa ka pateng kaba thymmai jong ki khlur Badminton.
Kane ka HPC kaba la ai kyrteng ka Dalmia Bharat Pullela Gopichand Badminton Academy, ka don ka jingheh hapoh ïing kaba 77,000 sq ft. Kane ka jaka ka don 8 tylli ki madan ïalehkai Badminton kiba la pynïoh lyer bad pynpyngngad bad ki jaka shong ki long 400 ngut bad la shna ïa ka ban pynlong ïa ki lympung ïalehkai National bad International.