Thmu ka AIADMK ban pynlong Myntri Rangbah da u EPS

U EPS u la ong ba yn sa thaw ïa ka jingïateh lok ha shwa ka ilekshon kaba long ka jingmyntoi ïa ka seng bad kaba ai jingmyntoi ïa ki paidbah.

Chennai, Nohprah:

Ka kynhun liang pyrshah jong ka Tamil Nadu, ka AIADMK, ka la pynlong ïa ka jingïalang ha ka Sngi U Blei bad mynjur ïa ki 26 tylli ki rai, ha kaba katto katne na ki, ki long pyrshah ïa ka sorkar DMK kaba synshar nalor ba la rai ban thung Myntri Rangbah biang ïa u Edappadi Palaniswami (EPS) ha u snem 2026 ha kaba ka jylla kan don ïa ka ilekshon sha ka ïingdorbar thawaiñ jong ka.

Ha kane ka jingïalang, ka seng ka la kyntu ruh ïa ka sorkar kmie ban pynthikna ïa ka jingaiti ïa ka pisa sha ka jylla Tamil Nadu khlem da leh shiliang khmat bad ban ym ïaid shakhmat ban tih ïa u marpoh khyndew u (Tungsten) ha Madurai.

U nongïalam ka liang pyrshah bad General Secretary ka seng u Edappadi K Palaniswami u la pynbna ba un leit jngoh ïa ka jylla baroh kawei naduh u bnai Kyllalyngkot 2025.

U EPS u la ong ba yn sa thaw ïa ka jingïateh lok ha shwa ka ilekshon kaba long ka jingmyntoi ïa ka seng bad kaba ai jingmyntoi ïa ki paidbah.

Haba ther tyngeh ïa ka seng DMK, u la ong, “Ka DMK ka dei ka seng kaba bamsap ha ka liang ka saïan. Hato ka jingïamareh kali (Formula 4)  ka donkam ïa ka Tamil Nadu? Ka seng DMK ka dei ka seng na ka bynta kiba riewspah ym na ka bynta baduk. Haduh mynta palat 50 tylli ki kynhun la thaw da ka sorkar hynrei kam pat don kano kano ka jingmih na kano kano ka kynhun.”

“Ha kane ka shisnem baroh ki heh sorkar na ki tnad bapher bapher, ki nonghikai ki la pynlong ïa ka jingïakhih. Ka jingkiew dor ka long kaba heh bha. Baroh ki dor ki la kiew”, la ong u nongïalam ka liang pyrshah ha ka General Council.

U EPS u la ong ruh ba ka DMK ka thmu da kaba thmu ban jop 200 tylli na ki 234 tylli ki Assembly konstitwensi ha Tamil Nadu.

“Ki kren da ka jingsngew sarong ba ka seng jong ki kan jop 200 tylli ki konstitwensi. Ka dei ka jingphohsniew bad kam lah satia ban urlong shisha”, u la bynrap.