Mumbai, Nohprah:
Ka Kynhun Myntri bathymmai jong ka Maharashtra ba la khlieh da u Myntri Rangbah ka jylla u Devendra Fadnavis ka la thung 39 ngut ki Myntri katba ka la pynhap noh ïa ki 11 ngut ki khmat bakongsan na ka kynhun synrop jong ka Mahayuti kaba la pynmih ïa ki jingïakhih bad ki jingpyrshah jur.
Ïa ka jingïakhih la wanrah ha ki jaka da ki nongkyrshan jong katto katne ngut ki nongïalam khamtam ha Yeola da ki nongkyrshan jong u Chaggan Bhujbal.
Napdeng lai ngut ki nongthep vote jong ka kynhun synrop kaba bat ïa ka jingsynshar, ka kynhun jong u Ajit Pawar jong ka Nationalist Congress Party ka la pynhap noh ïa 5 ngut ki nongïalam bapawkhmat jong ka kiba kynthup ïa u Chhagan Bhujbal, u Dharmarao Baba Atram, u Sanjay Bansode, u Dilip Walse Patil bad u Anil Patil.
Ka BJP bad ka Shiv Sena jong u Eknath Shinde ki la pynhap mar lai ngut ki dkhot. Ka BJP ka la pynhap noh ïa u Ravindra Chavan, u Sudhir Mungantiwar, bad u Vijaykumar Gavit katba ka Sena ka la pynhap ïa u Tanaji Sawant, u Abdul Sattar, bad u Deepak Kesarkar.
U Chhagan Bhujbal u la ai ïa ka rai ban ym don bynta shuh ha ka jingleit ïashim bynta ha ka dorbar bad un leit phai sha Nashik, ha kaba u la pynpaw ba u la duh jingkyrmen.
U la ong ruh wat lada la tyrwa ïa u ban shong ha ka Rajya Sabha, hynrei un ym pdiang satia mynta namar ba kata kan ym long ka hok ïa ki nongthep vote jong ka Yeola.
Uwei pat u heh nongïalam uba la shah pynhap u dei u Sudhir Mungantiwar, ïa uba la kyntait halor ka jingpynshisha jong u Devendra Fadnavis ba u la shah weng noh hadien ka “jingïakren sngewthuh jingmut kaba la neh slem bha”.
“Ngi la don ka jingïakren kaba jrong bad u Sudhir Mungantiwar halor ka jingpynïar ïa ka Kynhun Myntri. Lada um ïoh ïa ka shuki Myntri, ka don ka jingma ba un shah bynshet katto-katne ka jingkitkhlieh kaba khraw na ka seng,” la ong u Fadnavis.
Hynrei u Mungantiwar u la kyntait ïa katei ka jingkynnoh, da kaba ong ba u Devendra Fadnavis um shym la ïakren slem bad u halor ka kam Myntri.
U Fadnavis bad u heh nongïalam ka BJP ha ka jylla u Chandrashekhar Bawankule, ki la ong ba ka kyrteng jong u ka don ha ka thup Myntri ha ka sngi shwa ban pynïar ïa ka Kynhun Myntri, hynrei ka la kylla, u la pynshisha.
Katto-katne ngut kiwei pat kiba kumba ka paw ki don ha ka jingïakhun ban ïoh ïa ka shuki Myntri ruh ki la kut noh khlem ïoh ei ei.
Ka Sena khamtam ka la ïakynduh jingeh, ha kaba uwei na ki MLA jong ka, u Narendra Bhondekar, u la dep ban iehnoh ïa ki kam jong ka seng.
