Aizawl, Nohprah:
Na ka jingpynlong ïa ka jingkhynra hapoh ka jingïatreilang jong ka tnat shipai Assam Rifles bad ka Customs Preventive Force, Champhai, ka la pynlong ïa ka jingïoh kurup ïa ki 77 tylli song sikret ba wan na bar ri kiba shong dor palat ïa ka T. 1 klur ha Chhungte, Champhai distrik, ha Mizoram.
Ïa kane ka jingkhynra la pynlong ha ka 16 tarik u Nohprah, 2024, da kaba buddien bad pynshong nongrim ha ki jingtip ba thikna ba la phah da ki kynhun wadbniah, la ong ka tyllong khubor.
“Ha kawei pat ka jingkhynra kaba la wanrah jingjop ha ka jingïakhun pyrshah ïa ki kam khaïi tuh, ka Assam Rifles ka la ïoh ban kurup ïa ki 77 tylli song sikret ba wan nabar ri kiba shongdor T.1 klur tyngka ha Chhungte, jong ka distrik Champhai, ha ka 16 tarik, Nohprah, 2024,” la pyntikna ka tyllong khubor.
Ïa une u mar ba la ïoh ban kurup la aiti sha ka Customs Preventive Force na ka bynta ban leh ïa kaba donkam katkum ka aiñ. Kane ka jingkurup ka pynpaw ïa ka jingeh kaba dang ïai bteng jong ka jingkhaïi tuh ïa ki mar ba la khang pyrshah ha Mizoram bad ki thaiñ marjan.
Ka Assam Rifles, kaba ju khot kum ka ‘Sentinels of the Northeast,’ ka la trei shitom ban ïakhun pyrshah ïa ki nongkhaïi tuh ha kane ka thaiñ. Ka kynhun shipai kam dei tang ba ka kurup ïa ki mar beaiñ hynrei ka pynjur ruh ïa ki jingïakhun ban lap bad kem ïa ki riewbymman kiba donkti ha kum kine ki jait kam.
